15/06/2020

Mtayıb qerowo alohoyo cali ruho da sohde du Sayfo b’Holob

İ marcitho d’Holob di cito Suryoyto Ortodoksoyto mathkarla a’sohde du qtolğenso mariro du Sayfo.

Bi cito d’Mor Jirjis ud’Mor Afrem, mtayıb qerowe alohoye cali ruho da sohde du Sayfo, ube bzabno maqım teşmışyotho dilonoye qum dıhdo surto u hıdo qoyumtho du Sayfo dkıtne b’gawıd da wahde da tarte citotho.

Athmıl safrayto, mtayıb qerowe alohoye bi mditho d’Hlob bu athro d’Suriya, bu duxrono du yawmo da 105 ışne du qtolğenso du Sayfo dsımwola i mamlaxtho Cothmanoyto calu camaydan bu zabno du qrobo qadmoyo dıbritho.

Bi cito d’Mor Jirjis bi şawtho catıqto da Suryoye b’Hlob, ubi mıştawtıfonutho d’mowat mu camaydan mtayıb qurobo alohoyo cali ruho da sohde du Sayfo, dımrayşanle u efetrufo fatıryarxoyo da sebwotho di claymutho udi tarbitho Mşihoyto hasyo Mor Anthimos Jack Yacqub, bi methcadronutho d’qaşişo George Klor. Bıthır mıdkamıl u qurobo alohoyo, maqım teşmışto cali ruho da sohde uda qadişe qum di qoyumtho da sohde du Sayfo dmarkıwo b’gawıd du wahdo di cito d’Mor Jırjıs.

Bebzabno, mtayıb qerowo alohoyo bi cito d’Mor Afrem Suryoyo dkıtyo bi şawtho di Slemaniye b’Hlob, bi rişonutho du mcadrono fatıryarxoyo hasyo Mor Fetrus Qıssis dkıtyo bebzabno u mathlono fatıryarxoyo b’Hlob. Lu qurobano mıştawtafleste qaşişo Afram Wazir, şamoşe u şamışyotho u menyono celoyo dımhaymıne.

Bıthır mu qerowano, maqım teşmışto dilonoyto cali ruho da sohde u qadişe qum di surto da sohde du Sayfo dkıtyo bu wahdo di cito d’Mor Afrem.

Aslawothani dcali ruho da sohde du Sayfo, kmisomi xıd funoyo lu fusqono dmıdwola i Sunados mqadaşto di cito Suryoyto Ortodoksoyto i şato da 2015 u dımbayanwola 15 bu yarho d’Hzirın mkul şato u yawmo dıkmitathkır ebe a’sohde du Sayfo.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…