ESU frısle buyono lu renyo gawonoyo calu yowmo du duxrono du Sayfo

U Huyodo Suroyo d’Urifi frısle buyono Bi rişitho; Lu renyo gawonoyo dıbritho ula rişone dıbritho, bu duxrono da 105 eşne du Sayfo dsim ban 1915 cala Kaldoye-Suryoye-Othuroye-Orumoye.

 Bu buyonano, abıc ESU dgorış u zuhoro da rişone dıbritho cala hawbe dsimi calu camaydan u cali trawma dcayış u dımnase dımqafe şroyo li mawdyonutho bu qtolğensano dsımwola i mamlaxtho da Cothmanoye bu zabno du qrobo qamoyo dıbritho.

 Bi cohnutho dışafıc 105 eşne calu qtolğenso dsımwola i mamlaxtho da Cothmanoye calu camaydan, frısle u Huyodo Suroyo d’Urifi buyono leşan dı gorış u zuhoro da rişone dıbritho. Bu buyonano, ESU kımawdıc du camaydan, u camo şerşoyo d’Bethnahrinyo u huwle bu makthabzabno catirutho rabtho li mdinoyutho. Bi şato dan 1915, i mamlaxtho da Cothmanoye cama muttafikayda mtayabwola qtolğenso mtakso calu camaydan, calan Armınoye ucala Pontus Yawnoye u qtılwo hol 2 milyone u falge dıbnaynoşo, ba mo alfayo jbiriwo l’mafqono uğer jbiriwo dı qulbi Maşılmone u mahıtwo ido calu mal u mulkathe.

U buyono kımdawım u komır; Bu zabno dhın athrawotho dıbritho mawdelın bu qtolğensano, heş kito ğalabe fulhone leşan dmitıctarıf ebe. Calu kboşo sistematik dhawi cala Mşihoye ban 1915, Turkiya heş kımdawmo bu qşoco da came etnikoye bu athro ubu qlimo du Madınho Mescoyo. İ şultonutho Turkoyto kımankıro u qtolğensano u kımnasyo dmakliyo i kinutho.

ESU bu buyonayde grışle u zuhoro calu mınyono da Mşihoyani dfayşi adyawma b’Turkiya u tlıble ma rişone, ma şultonwotho uman athrawotho dıbritho dmawdın bu Sayfo dan 1915. U qtolğensano dmitaqbalwo xayifo b’Turkiya ubu Madınho Mescoyo, adyawma lıkowewo dyoşo cala zedqe noşoye, cala zedqe, cala tawdiyotho, timoyutho di demoqratoyutho u lıkmımsakwo folitiqore, gelyunore, akademikoye wa neşe wa tloye lıkmitahtiwo ba hbuşye.

U buyono kımawdıc;U şovenizim, i tuxmonoyutho, u ruğzo wu dyoşo di demoqratoyutho lıkrawhowo haqa ğalabe. ESU kımhane a şultonwotho, a farsufe wan athrawotho dmawdelın bu Sayfo u mawdacle i ntırto dkıtle, dan athrawotho hreneste dımtabqi a qonune Emwothoye udi demoqratoyutho. U qedomo lu camo Suryoyo bu Madınho Mescoyo, tedbir la timoyotho di demoqratoyuthoyo li ahutho da cameyo, lu şlomo ulu teqbilo di haymonutho da cameyo.

Bu huthomo ESU rızle a talabe dkıtle me Emwotho Mhaydotho, mu Huyodo d’Urifi, mu Huyodo Caraboyo ume ğer hayle u plattforme Emwothoye dmawdın bu Sayfo, dilonoyith a rişone d’Amerika udı Rusya. U Huyodo d’Urifi dmakle a hbose wa siyasat dkobın husrono lu camaydan. U tukoso Emwothoyo di Kinutho d’Urifi dtolıb me Turkiya dmawdıyo bu Sayfo. Dmıtlıb me Emwotho Mhaydotho dımbayno u statu du camaydan u dmitakle u qşocayde uda Mşihoye hrene bu Madınho Mescoyo.