Mtayıb u konferans rbicoyo du Mawtbo di Mdabronutho Yothoyto d’Şigur

U mawtbo di mdabronutho yothoyto demoqratoyto d’Şigur dmıştawtaflele ste a’Maşılmone Şica du garbiyo du Iraq, naqla hreto makadle di tarmithayde mhaydonithoyo la n’arcotho du Iraq ukmıhşowo u mathlo towo dkulle lu şroyo da krize du athro.

U mawtbo di mdabronutho d’Şigur bu huthomo du konferansayde u rbicoyo, sımleste qroyto li şultonutho du Iraq dmawdiyo bi tarmitho di mdabronutho yothoyto d’Şigur.

Bu calway “i mdabronutho yothoyto geşro yo li hirutho”, mtayabwo yawme d’Cruto dşaficina u konferans rbicoyo du mawtbo di mdabronutho yothoyto d’Şigur du garbiyo du Iraq. Lu lumodano mıştawtafwole 250 farsufe ma came uma falqe kenşoye mşahılfe d’Şigur, baynothaye Yezidoye d’athın m’Rusya um’Urifi u mathlone du camaydan uda Maşılmone Şica du garbiyo du Iraq. U nişo qamoyo du lumodano dmitahwe lıbritho yo d’Şigur u mathlo towo dkulle yo lu şroyo da krize dıkmicoşi ba fenyotho hrene du Iraq.

Bu buyono dıfris bu huthomo du konferansano, tlib mi şultonutho d’Boğdod umı britho dmıctarfi bi mdabronutho yothoyto d’Şigur, u mawdıc ste di tarmithathe latyo i mıcnayda floğo la n’arcotho du Iraq xdu mede dkımdacele u qlimo d’Kurdistan u hın ma hayle folitiqoye du Iraq, elo i mdabronutho yothoyto d’Şigur tarmitho ruşmoytoyo lfuth u nomuso esonoyo d’Boğdod.

U buyono grışle u zuhoro calu qyomo dımdewo bayn d’Boğdod wu gabo Demoqratoyo d’Kurdistan bi şato dşaficina, u mawdacle dkıtyo qtolcamo hatho bhaq da Yezidoye d’Şigur d’noşo lımdafacwole aclaye bu zabno da hçome marıhbone dsımwole Dacış, mawxa ste u buyono makadle da haylawotho d’Yezidxan gıdmitaqwın zıd, bnişo dlımikarır u qtolcamo dhawiwo cal Şigur bi şato da 2014.

Camgabıdathe, u buyono grışle u zuhoro cali aykanoyutho da Yezidoye dkıtne ba maşıryotho dıkmisım u duyoqaththe mu gabo di KDP, u mawdacle da galwoyani hawın xıd hbişoye bu taro du ambargo dmahıt aclaye, mawxa ste u buyono sımle qroyto la Yezidoye galwoye dıdıcri l’Şigur ud’bonın i fnithaththe m’hatho, cal di hiruthaththe masırtoyo cami hirutho d’Şigur.

U buyono bu huthomayde kmawdıc da Maşılmone Şica mıştawtaflın hınne ste li mdabronutho yothoyto d’Şigur, laşan dımmathli u camaththe b’gawıd di tarmithathe, ukımakıd ste di dawsathe ulsoytoyo ba fulhone di mdabronutho yothoyto dhawyo mathlo lu şroyo du kriz du Iraq.