MUB sımle qroyto dmitagle cali ctidutho du mşalo du wahdo d’Suriya d’MUB ağunisto Sacid Malke

U Mawtbo Umthoyo d’Bethnahrin d’MUB, sımle qroyto lu kenşo emwothoyo dsoyım hboso calu rejim d’Suriya, bnişo dmagle cali ctidutho du mşalo du wahdo d’Suriya d’MUB ağunisto Sacid Malke.

Camgabıdathe, MUB bu buyono dıfrısle tlıble ste mu camaydan du athro udi golutho dımtakıs ruhe udımhayıd udımhalıx bu darbo di hdoyutho umthoyto, bnişo dmınfıq mqabıl di tahrazto cjıqto du rejim d’Suriya dkobıc dmafşır udlohe u camo Suryoyo bu taro di umtho Caraboyto şofenist.

U Mawtbo Umthoyo d’Bethnahrin d’MUB bu şuroyo du buyonayde dıfrısle lu ray gawonoyo dıbritho, kmamte lu bolo du mşalo du wahdo d’Suriya ağunisto Said Malke, bu siqumo d’12.08.2013 bu bethtawso d’Qamışli mıdwo yasiro ma hayle du rejim d’Suriya. MUB bu buyonayde dımqalasle a’fulhone du hawro Sacid mırle ste “bgawıd da 8 ışne dşafıcina ba buhone wa fulhone kulle dsimi bgawıd d’Suriya u b’darğo beynemwothoyo, lo qdir dmımte l’mawdıconutho qrıhto bhaq di ithutho du hawrano didan. U rejim d’Suriya xıda hawbe hrene di noşutho dsımle, mnasele dımkase calu medano ba dugle ub’dokumente mzawre. İ tuhmonoyutho du Bacıth dıkmankır i hiyoyutho umthoyto du camo Suryoyo, bkul mkono ksoyım hjome mşahılfe calu ağuno du camo Suryoyo ubu şıkılano kımnase dmazıcle u dmatımle. U rişono d’Suriya Başar Al Asad meqım zabno karyo huwole maqırhonwotho dıkmankıri a Suryoye xıd camo u dıkmarre Araboye Mşihoye, bu şıkılano naqla hreto mahwele i fotho şarırto du rejimano. Calathe i tahrazto şarırto du rejimano dlohe a came u dxolıq umtho şoweniz dha şıkıl dkıtyo Araboyto udu Bacıth’yo. Wu mednao fhim me britho kula ubşıkıl lo ruşmoyo simo iclan”.

U buyono d’MUB dıgrışle u zuhoro du camaydan dhowe mahio ma tahrazyotho cjiqe du rejim d’Suriya, ba melani mdawamle “u rejimano mqabıl du camo Suryoyo mafıtle la haye bkul haqlo da haye i termitho rabtho du tefşiro u mnasele dmaqwe i arcoyutho di ithuthayde. Calathe u camo Suryoyo mıqqa dqodır dmowfıq li idactho u qento di siyase du Bacıth, haqa gıdqodır dımşawşıt u ağunayde leşan dımdafıc bhirutho a timoyothayde wi hiyoyuthayde. Midıd hol dlo xolıs mi asirutho dcami siyase cjıqto du rejim du Bacıth, latle mkono dhowe hiro u dmote l’sistem demoqratikoyo. İ wolitho asasiyaydanyo d’midoco i ithutho du Hawraydan Said Malke dhule ağuno leşan u camaydan d’Suriya dmitanhır u dmoyıd a zedqayde, u d’mıtlıb hşowo mu rejim d’Suriya, u d’mıhkım ba hawbe kulle dsımle. Calathe ksaymina qroyto lu camo Suryoyo kule dnofıq moro la abne u bnothayde, dı tolıb hşowo mu rejim d’Suriya, bu athro ubi golutho dmitakıs leşan di hdoyuthayde i umthoyto u bıklayto d’fusqono kamilo dmaqım a tahlukat dkito acle. Me gabo hreno kmaczımina a hayle beyemwothoye, a şutose noşoye dsaymi hboso calu rejim d’Suriya leşan dmitawfıqo li holo i aykanoytho du hawraydan Said Malke”.

Bu huthomo du buyonayde, u Mawtbo Umthoyo d’Bethnahrin d’MUB sımle qroyto lu camaydan u mothonoyo leşan di hirutho du ağonisto Said Malke bkul duktho dmacle u ağunayde. U camgabıdathe, MUB makadle dgımdawım a’fulhonayde bdarğo beynemwothoyo leşan dlımıtce u Hasyo di Cito Suryoyto Ortodoksoyto d’Holob Mor Ğriğoryus Yuhanun Abrohum wu Hasyo di Cito Suryoyto Malkoyto d’Holob Mor Bulus Al Yaziji, u tlıble ste mu camaydan bi sbuthathe dsoyım harake bmahisutho.