Nacim Qassem matcanle i şultonutho d’Lebnon i mşalutho dhowe fıtne aw qrobo gawoyo hatho bu athro

LEBNON — U notarrozo gawonoyo d’Hizballa Nacim Qasem mzaharle dlıgıdhowe haye bu athro d’Lebnon, ida dımnasyo i şultonutho dnıfoq mqabıl du gabo dkıtyo masro camu İran, u mırle “layto haye l’Lebnon ida dkolitu bu dalqublo, udımnasitu dnıfqitu mqabıl didan udmatimutolan. Lebnon lıkmıbne dlo ma n’asasayde kulle”. 

Qasem bu mamlo dsımle adyawma bu froshezwo, makadle du gabayde lıgıdmaslım u zaynayde hul dkımdawmo İsroyel ba hçomayda ubu kboşayda la hammış talle dkıtne bu taymno d’Lebnon. 

Lfuth Reuters, Qasem mawdacle di şultonutho d’Lebnon ktıcno i mşalutho in dothe dmifarfıso i aykanoyutho gawoyto du athro, u thımle ste i şultonutho dmaslamla Lebnon l’İsroyel bu fusqono dmıdla bi sbutho du zayno d’Hizballa, u mzaharle du medano kibe dmawbıl u maşıqlo laf qrobo gawoyo. 

I maqırhonuthathe d’Qasem athyo luhwoyo bıthır mdımkamele adyawma u notarrozo du mawtbo celoyo di mşaynutho umthoyto du İran Cali Larijani i socuruthayde l’Lebnon, wa lqoyotho dhawile cama tloth rişınwotho du athro. 

M’gabo hreno, u rişono di fnitho garbyoyto d’İsroyel Rafi Milo mawdacle da mkone dafyışle Hizballa dmadcır u haylo dkıtwole meqım hawın adyawma mhile, bıthır ma hçome İsarloye dsimi cala şutosayde. 

Milo bi maqırhonutho dhule athmıl, mawdacle du gayso İsarloyo gdımdawım dmıstacmıl u haylayde bnişo dmifarfıs u zayno d’Hizballa, udlımşakıl m’ucdo w’azolo tehdid la thume du garbiyo d’İsroyel. 

Milo mawdacle ste du groşo du gayso d’İsroyel ma hammış nuqazyotho dkıtne bu taymno d’Lebnon masroyo camu tetimo di harake dkıtle Hizballa b’gawıd di fnitho, u madhkarle ste du mabco dkıtla i şultonutho d’Lebnon dmaltımo u zayno d’Hizballa kmiqadamle b’şıkıl msimono mi xasra d’İsroyel.