Nfiq mqabıl da qole dkıtne saqıbloye li socurutho du Papa lu Iraq
U rişwazire du Iraq Mustafa Alkadhimi mawdacle di socurutho dgıdsamla i qadişutho du papa lu athro du Iraq, gdımcadro bu teqwiyo di şalyuthayde.
Camgabıdathe, hın ma rişone folitiqoye du Iraq nafiqi mqabıl da qole dkıtne saqıbloye li socurutho du papa.
U rişwazire du Iraq Mustafa Alkadhimi, athmıl bi ytawto dhawile camu rişızgado du Vatikan bı Boğdod Metga Lıskover, drişi a’hıdriyat dıkmisomi laşan u qubolo du papa Mor Fransis Qadmoyo dıkmıntır dmabde i socuruthayde lu Iraq hamşo bu yarho d’Othır dıbqamuthayna.
Alkadhimi bi ytawtathe, makadle di socurutho di qadişuthayde gdımcadro bu teqwiyo di şalyutho du Iraq ubu froso di ruho di ahonutho b’gawıd du athro ubu qlimo gawonoyith. Bebzabno, Alkadhimi mawdacle di şultonutho du Iraq wu camayde b’iqoro kımqadmi li socurutho du papa, ula fulhone dıksamlın bu haqlo du nfoqo mqabıl da qrobe, di tuhmonoyutho udu froso du şbuqyo bı britho.
Megabo hreno, u rişono du gabo dı Tayyar Alsadır Muqtada Alsadır, mayadle i socurutho dgıdsamla i qadişutho du papa lu athro du Iraq, u grışle ste u zuhoro cal hın qole Iraqoye dkıtne saqıbloye li socurutho di qadişuthayde. Alsadır bi maqırhonutho dıfrısle bi dafayde du Twiter mırle “hawili xabro dkito hın saqıbloye li socurutho du papa lu Iraq. Ino kımarno i methfathonutho dcala tawdiyotho mede towoyo, ukımmina bşayno ebe bu athraydan du Iraq. A lebawothaydan meqım ma tarcaydan ftihene laşane, wi mditho d’Alnajaf gıdmıstaqıblole xıd rohumo du şlomo”.
Mxasra hreto, 10 alfo Mşihoye kımtaybi ruhaye dmıstaqıbli u papa bi mditho d’Arbil şawco bu yarho d’Othır dıbqamuthayna. U şutoso du tboco froso di cito Kaldoyto b’Arbil, mırle “mqayadlan anışmone da Mşihoye dgıdhıdri u qerowo alohoyo dgıdmitayıb bu wahdo di esfireğlo d’Franso Hariri b’Arbil, u gıdmıştawtafle zıd m’10 alfo Mşihoye ma mdinotho mşahılfe du Iraq, baynothaye gıdhowe ste Mşihoye ma nathrawotho şbobe um’Urifi”.