Nort Press frısla tebo ba melani; Ahçome dıkmkarıro Turkiya kımhadıd i şalyutho da Mşihoye d’Tel Tamır

U gayso kaboşo d’Turkiya ba hçome haroye dsımle cala qıryawotho du camaydan u Othuroye du Xabur, kmahwe dlatle furşone mu tukoso marıhbono d’Dacış dkımnasın dmaxlın a fenyotho du camaydan b’Suriya.

Ba hçome haroye dsimi cali qritho d’Tel Tawil bu Xabur, athto mu camaydan mawdacla dkıbco dımgalwo l’Kanada, elo athto hreto makadla dlıkrumşo mi qrithayda mıqqa d’qoşın a hçome barbroye d’Turkiya calu Xabur.

“A hçome dıkmkarıro Turkiya kımhadıd i şalyutho da Mşihoye d’Tel Tamır”, ba melani i dafo d’North Press frısla tebo rwiho cala tathir dtrelın a hçome haroye dsımla Turkiya calu camaydan dfayış ba qıryawothayde du Xabur bu garbay madınho d’Suriya. I zuctho dıkmahwiyowa cal fotha, athto mu camaydan-Elişwa Yusıf mahzamwola lu bayto da şbobayda bu zabno dımhalaqwole u gayso Turkoyo wa marhıbonayde soruhe cali qrithayda d’Tel Tawil 29 bu yarho d’Ob dşaficina.

A comure di qritho d’jbiriwo dmahızmi l’ğer duktho, daciri naqla hreto bıthır mıd mcadlo eşmo i aykanoyutho bu Xabur. Bi netiçe da hçomani huwo husrono momunoyo rabo la bote ula mulkone du camaydan di qritho. Elişwa dımhase u barzawgayda meqım 3 ışne, kcayşo ucdo cam hın ma qaribe dfayışla b’Tel Tawil, bıthır mıd mgalwelın a 3 nacimayda l’Kanada. Elişwa bu mamlo dsımla l’North Press kımmo; Yatutowi bu bayto inaqla dhawınwo a hçome. Mahzamwoli lu bayto da şbobe. U hçomo ğalabe qaşyo we. Zaycinawo u ruclanwo.

Elişwa cıl mıd fayişo masırto bu cafrayda ban ışnani du qrobo, elo kmawdıco dkıbco bıthır ma hçome haroye dızza l’Kanada, u kımmo Abri tamoyo, gıdzzino u haw gıducrono. A bıstone wa haqle di zarocutho di qritho, adşato naşıf cal da comure du camaydan lo qadiri dmaştanne mi zuctho da hçome d’Turkiya. Athto hreto mu camaydan dcımra ba 50’yat rfıdla dnıfqo qum di sayirto u mırla; Adşato zrıcwolan i yarquthaydan, elo u mahsul kule harıw mu sahwo, cal dlo qadrina dmaştenale mi celtho da hçome”. I athtathe dkalyo qum du tarco du baytayda b’Tel Tawil, maftela fotha lafi xasra d’Turkiya u mırla “Turkiya kıbco dmaxılyo a qıryawothaydan, elo u medano casqoyo ela. Aydarbo gıdtıryono u baytaydi dbneli bi dactho dbeyn caynothayna? , u aydarbo kibi turyono i qritho dımrabyono eba?”.

Camgabıdathe, i aykanoyutho di qritho d’Im Wağfa du camaydan latyo ğalabe frışto mi aykanoyutho d’Tel Tawil dhçımwo acla me Turkiya. Eliya İşo dcımre 65 eşne, khoye bi qritho cami barthzawgayde u 2 ma nacimayde, wu ucdo kowe moro li cito d’Mor Qıryaqos dkıyo sxirto mu zabno dmatyowa Turkiya la thumayda ba 2019 uhulucdo. İşo bi maqırhonuthayde komır; Sxırlan u tarco di citaydan mu zabno dmatyo Turkiya la thume di qrithaydan. Lo fayışlan harke lo kohno ulo şamoşe. I cito d’Mor Qıryaqos belhude la socurwotho ula buyoye kfıthinala.

Ba hçome haroye dTurkiya, nafıl menyono d’foqucotho cali qritho d’Im Wağfa, ubi netiçe hîw husrono li cito u lhın ma botayda. Lfuth Noth Press, bi qritho d’Tal Tawil dkiba zıd me 100 bote, ucdo belhude khoye eba 40 farsufe wa hrene bu zyudathe mgalwelın mu athro. Ubi netiçe da hçome haroye dsımwola Turkiya, shif 8 bote u hın’ste hzelın husrone mşahılfe.