Pompeo mahwele hfuxyo mqabıl du qyomo beyn du Sin u du İran

Amerika mahwela hfuxyo qaşyo mqabıl di awyutho dkito bayn du İran wu Sin bu haqlo da istixbarat udi mudafaca folhoyto.

U waziro di baroyutho d’Amerika Mayk Pompeo, mawdacle du qyomo dımdhe bayn Tahran u Pekin u yarho dşaficina, kımharhız i şalyutho bu qlimo du madınho mescoyo.

Uqyomo dımdewo bayn du Sin wu İran bu şuroyo du yarho d’Tamız dşaficina, kımdawım dxolıq şğuşyo la hayle rabe dıbritho dilonoyith l’Amerika.

Calu qyomano dkıtyo l’zabno d’25 ışne, u waziro di baroyutho d’Amerika Mayk Pompeo mawdacle du qyomo dımde bayn du İran wu Sin celtho du hırhozo du qlimo du madınho mescoyoyo.

Bi maqıblonutho dsımle acme u ajans da tebe d’Fox News, Pompeo mawdacle du qyomano dıkmote u timayde l’400 milyare dolare kxolıq qetre u casquwotho rabe bu haqlo di mşaynutho.

Cali sbutho di methcadronutho qwitho dgıdhuyo bayn du İran wu Sin lfuth u qyomo hatho, Pompeo mırle “lıklozım dhowe mede dumoro da şultınwotho dıkdayşi i hirutho ba nathrawothathe u dıkxılqi aykanoyutho lo şlitho larwal da thumathe, krıhmi qulnaqla dfılhi camıhdode. Kmıtyaqano da nathrawotho du madınho mescoyo klozım dhozın u medano cali şariruthayde. U cboro du Sin lu İran gdımharhız i şalyutho du madınho mescoyo. U İran heş u athro rabo dkuleyo dıksonıd i marıhbonutho bı britho, wu İran bu zabno dmote lu sistem da zayne u di tagorutho dıksamla u gabo da Komonist du Sin, gıdzoyıd u qento di mşaynutho bu madınho mescoyo”.

U waziro di baroyutho d’Amerika Mayk Pompeo bi maqırhonuthayde, makadle di mdabronutho d’Waşington gıdsaymo u garanti dmitafiti la haye aqonune wa tedbire kulle dmahti calu rejim du İran, ucalu gabo da Komonist du Sin cala fulhonayde ucal şırkat dkıtle.