Pompeo makadle d’Amerika lıkşubqo a hjome wa tahdide dkowın acla

U waziro di baroyutho d’Amerika Mike Pompeo bu mamlo dhawile camu rişwazire catiqo du Iraq Cadıl Cabdılmahdi, mawdacle dıklozım dmimıd hşowo ma grube mzayne dsımlın hjome cali foqudutho d’Taji bu garbiyo d’Boğdod.

 Be bzabno, Pompeo makadle d’Amerika lıkşubqo a hjome wa tahdide dkowın cala folhe u barmothoye d’Amerika.

 İ malılto di wazirutho di baroyutho d’Amerika Morgan Ortagos bi maqırhonutho dhula lu tbocofroso mırla; U waziro di baroyutho d’Amerika Mayk Pompeo mıjğele athmıl camu rişwazire du Iraq Cadıl Cabdılmahdi, laşan dıdorış acme a’hjome haroye dsimi cali nuqazto folhoyto Iraqoyto d’Altaji dıksaymo baytoyutho la haylawotho du koalisyon emwothoyo mqabıl Dacış.

Ortagos mawdaclaste d’Pompeo makadle di şultonutho du Iraq klozım dımdafco u koalisyon dkımrayşınole Amerika udkımcadarla bu qrobo mqabıl du tukoso marıhbono d’Dacış.

Lfuth Ortgos, u waziro di baroyutho Pompeo bu mamlo dhawile camu rişwazire du Iraq grışle u zuhoro cal Amerika dlıkşıbqo ahjome wa tehdide dkowın cala ruhwotho Amerikoye, u mawdacleste d’Waşington gıdmaydo tedbire hrene laşan dsaymo u sutoro druha bu zabno dıklozım.

İ maşritho folhoyto d’Altaji dkıtyo bu garbiyo d’Boğdod udıksaymo baytoyutho l’folhe Amerikoye, yawme d’şabtho dşaficina hawyowa nişo l’hjome qaşye bıthır me 3 yawme mı hjomo hreno dsımwo acla udıqtılwo ebe tıre folhe Amerikoye u folho ha Britanoyo. Ubu funoyo dhulın cala hjomani, atayısyotho folhoye Amerikoye sımlın hjome qaşye cala grube mzayne d’Alhaşd Alşacbi dıkmısnodi mu İran dkıtne frise b’Suriya ubu Iraq.