Pompeo u Çavuşoğlu bu knuşyo du NATO mqatelın bu mamlo

İ qale da mele dhawyo bu knuşyo da wazire di baroyutho dan athrawotho hadome bu NATO, grışla u zuhoro calu şıkıl du dactith du huyodano u sniqutho da şuhlofe dıklozım dsoyım li şato da 2030.

 Bu knuşyano dsımle u NATO bu darbo du nawlo, qayıth u waziro di baroyutho d’Amerika Mike Pompeo wu waziro di baroyutho d’Turkiya Mevlut Çavuşoğlu bıhdode calu kriz du madınho du yamo Mescoyo u calu sistem da soruhe d’S-400, dızwınla Turkiya me Rusya.

U waziro di baroyutho d’Amerika Mike Pompeo wu baramnayde u Turkoyo Mevlut Çavuşoğlu, qayithi athmıl bıhdode ba mele harufe dmıstacmelın mqabıl dıhdode bu knuşyo dımtayable u NATO cama wazire di baroyutho dan athrawotho hadomayde. Pompeo thımle Ankara dıkxulqo jğuşyo u hboso calan athrawotho bnayqyomo du madınho du yamo Mescoyo u bu snodayda l’Rusya bu zwono du sistem da soruhe d’S-400.

Çavuşoğlu’ste mfanele bı qaşyutho u thımle Pompeo bu şejoco da Urifoye dmihaydi u dnufqi mqabıl d’Turkiya u dbı samyutho ksundi u Yawnan u d’Amerika krofdo dımzabnolın soruhe d’Patriot. Umşalo Turkoyo dıthımleste Amerika bu snodo da Kurdoye b’Suriya mırle; Amerika u Fransa maqşelın u kriz b’Nagorno Qarabax bu snodathe l’Armenia qrobo dqmırla Azerbaijan bu snodo folhoyo d’Turkiya.

U knuşyano dhadırle Pompeo b’dukthe du rişono Amerikoyo, kit dhowe u haroyo  bıthır mıd rakiwo i şultonutho hathto d’Joe Biden. Mawdıcste hadome frişe bu NATO snıdlın u mamlano d’Pompeo mqabıl d’Ankara u krih u qedomo wa zawcayda. Bi harayto du knuşyanoste nafıq li holo d’Turkiya simo izola beyn da 30 hadome hrene u rfid u talab dhawile Çavuşuğlu mu NATO dımdaxıl b’Libya u kriho i mudaxala d’Turkiya bu madınho du yamo Mescoyo, b’Libya, b’Suriya u bı Nagorno Qarabax.

Wu knuşyano du NATO’ste, bu normal gıdmıdraşwo u buhono, cal aydarbo klozım u huyodo du NATO dımşahlıf ruhe bu dowro dıbqamuthayna awkith ba 2030. Hatheste, bıthır mıd Fransa meqım şato grışwola u zuhoro cala şwole dkıtwo beyn da hayle hadome du huyodo; beynothaye i sbutho d’Turkiya. U rişqutno Franşoyo mırwole; U huyodo kıcoyış ucdo baykanoyutho dkıtyo u meho du NATO mitho. Calatheste tlıbwo ma hadome kulle durşi amkone du şuhlofo dıklozım dmisım bu NATO.