Qoyume Urifoye mşadarlın egartho mşawtafto la mşale u rişone du Huyodo d’Urifi cali sbutho d’Suriya

BRUKSEL — 9 qoyume du parlamento d’Urifi me gabe frişe dan athrawotho d’Almanya, Beljika, İrlanda, Yawnan, Fransa u İtalya mşadarlın egartho mşawtafto li rişonitho du Komisyon du Huyodo d’Urifi-Ursula von der Leyen, li mşalonitho da esore baroye du Huyodo d’Urifi-Kaja Kallas, calu cnufyo sistematik dıkmisım b’Sweda ubı ğer dukotho du taymno d’Suriya.

A qoyume mawdaclın u ğamo dıktucni cali siyase dıkmaşyo i şultonutho-dilonoyith bu taymno du athro wu tathir dıktore u cnufyano cala qalilotho di fnitho dıkfayti b’maşıqlo ğalabe yaquro. Bi egarthathe a qoyume, grışlın u zuhoro cala hçome sistematik dsımlın a hayle dkıtne masre bi şultonutho cala fenyotho d’Sweda, Hımıs, Hama, Jaramana, Sahnaya uğer. Wu husrono rabo dhawi calu bınyono tahtoyo, i bsirutho du muklo uda maye, du kahrobo u shıflın a bote da mdinoye, qtilın, htıflın u jbırlın a comure li golutho-uhani kulle kmisomi bi mşalutho baroyto d’Darımsuq.

Bu tarano a 9 qoyume Urifoye rızlın a 10 talabathe ma mşale du Huyodo d’Urifi u beyn dani kito; Dmiçazın a mşale Suriye kulle dhzın more d’hawbo, bıthır ma buhone şarye dsimi. Lo mitahwe aftho la mşale du athro-xıd Ahmed al Şarıc, Ascad al Şibani dmarkıwi mdabronutho autoriter. Dmisım hboso u dmitahıt şartat qum Darımsuq leşan dmaydo i mşaluthayda lu bnoyo du athro ulu sutoro da zedqe noşoye u dilonoyith da qalilotho.

Dmibayın sictho dımcaqbo a şuşote dkowın b’Suriya. Bu huthomo di egartho a qoyume mzaharlın a mşale Urifoye dlo fayışi şalye mqabıl d’mkono d’gunho hreno rabo bu makthabzabno d’Suriya. U Komisyon Urifoyo klozım dfolıh b’caşinutho leşan dmitakle u qatlo wu haşo u dobe egartho qrıhto, dlatle tolerans lhawxa mede. A şutose frişe du Huyodo d’Urifi klozım dımşaçci Suriya dımtabqo a zedqe da came kulle leşan u terkiwo d’athro demoqratoyo.