Qoyumto Hatimoğulları mqadamla rmoyto dmiqafe Hurmüz Diril

I qoyumto du gabo d’HDP di mditho di Adane Tülay Hatimoğulları  mqadamla rmoyto dı şwolo lu waziro di Kinutho d’Turkiya bi sbutho dmiqafe Hurmüz Diril.

 Me gabo hreno fris video bı 12 leşone frişe dıktolıb dmiqafe Hırmiz Diril u ktolıb kinutho l’Şmuni Diril.

 Qoyumto Tülay Hatipoğulları dkıtyo bcayni zabno i mcadronitho da rişone zawgoye du komisyon da came uda haymonwotho d’HDP mqadamla rmoyto dı şwolo lu waziro di kinutho d’Turkiya Abdülhamit Gül, leşan dmiqafe Hürmüz Diril u leşan d’Şmuni Dirilste dmitamte kinutho.

Bi rmoyto d’Hatipoğulları kmitawmır, “a nacime du zawgano lfuth da mkonaththe karixi cali emo wu bababaththe. Bu şıkılano u abro mqafele i şlado di emayde Şmuni Diril 20 bu yarho d’Odor.”

Calathe i Qoyumto Hatipoğulları kımşaylo lu waziro Gül; Qay hani şato kamılto lo sim fulhone rwihe du kroxo leşan dmiqafe u zawgo Diril? Qay hollocdo lo mqafın a qatole dı Şmuni Diril?

Me gabo hreno u şutoso Iraqoyo di mcadronutho da mşihoye frısle video dıkmisım buwe qroyto bı 12 leşone dmiqafe Hurmüz Diril u dmihaqıqo i kinutho leşan Şmuni Diril.

Bu Vidyo cam gabıd dıkmitawmır “Hurmüz Diril aykoyo?” “kıbcina kinutho leaşan Şmuni Diri”, mahıtste mi naqa mın hawi mu siqumo dı 7 Konun u haroyo da 2020 dmıdwo u tebo haroyo mu zawgo d’Diril.

Ba casrowat farsufe ba lecze du leşono Suryoyo, Turkoyo, Kurdoyo, Araboyo, Rusoyo, Gurcoyo, Spanoyo, Almanoyo, Vietnamoyo u Fırsoyo

Işqad 7 bu yarho d’Konun u Haroyo u zawgo d’Diril htifi mi qritho d’Mehre bi mditho d’Şırnak u bıthır me 70 yawme mqafyo i şlado d’Şmuni Diril elo şafıc zıd me şato heş layto xabro me  Hürmüz Diril wa qatole dı Şmuni Diril lo mqafın.