Qtil 6 farsufe ba tagliyotho d’Al Sadır

Ba taxtuşe dhawın beyn da noqufe du rişono Şica Muqtada al Sadır u da saqıbloyayde b’Nasiriyah du Iraq, qtil 6 farsufe u ba casrowat dıhrene mjarhi.

 Ucnufyano athi lu huwoyo beyn da bnaynoşo dmıştawtafwolın la tagliyotho da 2019 dsimiwo mqabıl di şultonutho u da noqufe d’al Sadır, bıthır mi qroyto dsımwole la sanodayde dmahwın u haylo dkıtte.

U mınyono da farsufe dıqtili ba tagliyotho dsimi athmıl b’Boğdod u b’Nasiriyah, bıthır mi qroyto du rişono tawdithoyo da Şica du Iraq Muqtada al Sadır, cali adyawma l’6 farsufe; 5 menaye bu zayno dımhe ebeye uhol 60 hreneste mjarhi. Bğer mdinothoste mıdle u polis tedbire casye leşan dılo nofıq taxtuşe ba zabuqone.

A taxtuşe hawın beyn d’2 hayle saqıbloy amtagliyone dmıştawtafwolın la protestowiye bu yarho d’Teşrin u qamoyo da 2019 mqabıl di şultonutho d’Boğdod u da noqufe uba casro alfayo ma sanode d’Muqtada al Sadr, tlıbwole athmıl menaye dmahwın u haylathe.

Bi mditho d’Nasiriyah bu tayımno du athro thımlın a noqufe d’Sadr bu mhoyo du zayno ebeye u bu tewqido da xaymothathe bu wahdo d’Habubi. Adyawma safraytoste amtagliyone dkıtne mqabıl di şultonutho kfixi la zabuqone leşan dmarkıwi a xaymothathe. Boğdodste mıdla u rişono da powelıs d’Nasiriyah mi wolithayde u mabde buhone cala taxtuşe dhawın celtho lu mawto d’6 farsufe.

Ba taxtuşe dhawınwo ba 2019, qtılwo ba mowat dıbnaynoşo u bi netije xlıqwo hfuxyo mqabıl di şultonutho du rişwazire Cadel Cabdul Mehdi u tlıbwo dmıstacfo. U rişwazire ducdo Mustafa al Kazimi kımnase dmote la mtagliyone u la talabathe u mbayanle, dmisomi a guboye gawonoye şnize du athro bu yarho d’Hizron da 2021leşan dminaqe şultonutho hathto dkiba dımdabro u athro.