Mşalo Amerikoyo b’Suriya Ethan Goldrich merle: Amerika korıfdo kul şıkıl d’hçomo folhoyo hatho calu garbay madınho d’Suriya

WAŞINGTON – U mathlono Amerikoyo dilonoyo b’Suriya Ethan Goldrich, bi maqıblonutho dsımle acme u froshezwo d’Suriya, naqla hreto makadle d’Waşington krıfdo dmisım hçomo folhoyo calu garbay madınho d’Suriya, u mırle “kul hçomo folhoyo cal Suriya kımhadıd i mşaynutho da folhaydan. Wi şkihuthaydan b’Suriya mhadadtoyo ukıtla asirutho camu nfoqo mqabıl di marıhbonutho. Kıtlan şawtofutho ulsoyto cama haylawotho d’Suriya demoqratoyto d’QASAD bu ağuno dıkmitahwe mqabıl di marıhbonutho. Ubebzabno ksındina u diyalog bayn da falqe Kurdoye laşan dmişarrıro i şalyutho”.

Goldrich mathkarle ste dkıtlın esore aminoye cami saqıbloyutho d’Suriya, u mawdacle di saqıbloyutho kıtla dawro dıklozım dmıştacyole.

Camgabıdathe, Goldrich makadle i klayto d’Amerika dıkrıfdo dmisım esore camu rişono du rejim d’Suriya Başşar Alasad, u grışle u zuhoro cali ulsoyutho dmıkle calu şroyo folitiqoyo b’Suriya, udmitafıt la haye u fusqono d’Emwotho Mhaydotho da 2254. Goldrich mırle ste “ahna qrihena, lıgıdsaymina esore camu rejim d’Alasad, u mırlan la n’athrawotho dsımlın esore dlıgıdqathxu mede m’Suriya. Amerika makşarla b’Suriya, ukıtla klayto qrihto bi sbutho da n’esore dcamu rejim d’Alasad. Ubebzabno ahna lıtfıklan noşo dızzeyo laf Başşar Alasad, ulıksındina noşo bi sbuthathe”.

U mathlono Amerikoyo b’Suriya, makadle ste du athrayde gdımdawım dnofıq moro la tedbire dmahti calu rejim d’Suriya, u mawdacle dkul dyoşo dıkmisım bhaq da tedbirani gıdmitahwele funoyo.