Qtil galwoye Iraqoye bi maşritho d’Al Hol

Bu zabno da 10 yawme haroyani, qtil 4 galwoye Iraqoye dkıtwın bi maşritho d’Al Hol bu garbay madınho d’Suriya.

 Bu tebano dıfris mi Mşatasto da zedqe noşoye d’Suriya mawdıc, da hayobani dheş latne idice, mjarahlınste folho du Asayiş dıksamwo u duyoqo di maşrithathe.

 A galwoye Iraqoye dkıtne bi maşritho d’Al Hol bi Gozarto d’Bethnahrin, kloqın casqutho, rdufye u cnufyo ma galwoye hrene dkıtne bi maşrithathe. Lfuth u tebo dıfrısla i Mşatasto da zedqe noşoye d’Suriya, bıgawe dan 10 yawme haroyani, bı idacto qtil 4 galwoye Iraqoye.

Bi maşrithathe d’Al Hol, kfayşi a marhıbone d’Dacış wa yaqrothathe dımsiki ma Haylawotho d’Suriya Demoqratoyto wu duyoqo di mşaynutho di maşrithatheste, kmisım ma hayle da Asayış. Mawdıc, dfarsufe msalhe mhelın bu zayno b’galwoyo Iraqoyo dıkfolahwo meqım cama hayle da Asayış.

Baroyo bıthır mu hjomano dsim calu galwoyo Iraqoyo, nafıq taxtuşe beyn da hayobe u da hayle du Asayış. A hayobe qadiri dmahzımi mi maşritho bıthır mıd mjarahlın ha ma folhe du Asayış. Me gabo hreno, 3 bu yarhanoste qtılwo galwoyo Iraqoyo qum di xaymayde u bcayni yawmo, qtılwo galwoyo hreno.

25 bu yarho dşafıcinaste qtılwo naqla hreto galwoyo Iraqoyo hreno cal dıksonadwo a hayle d’QASAD dhani zabno yarixo ksoyım qroyto dkul athro klozım dnoqıl a marhıbonayde mi maşrithathe dıkmşaklo qento jıddi li mşaynutho du garbay madınho d’Suriya.