Romio Hakkari hadır lu lumodo trayono du snodo di federaliye du Iraq

Bi mdito d’Arbil mtayıb u lumodo trayono du snodo di federaliye bu Iraq awkith dmişahılfi a hiğmınwotho l’qlime şarye di mdabronutho.

 Lu lumodano dımtayıb mu enstitut Iraqoyo du snodo di federaliye, mıştawtafle menyono ma rişone da gabe u tukose du camaydan u Kaldoyo Suryoyo Othuroyo.

Folitqoye, nahire, rişone d’caşıryotho Caraboye, kothube u gelyunore mıştawtaflın lu lumodo II du enstitut Iraqoyo du snodo di federaliye dımtayıb 16 bu yarhano bi b’Arbil bu qlimo d’Kurdistan du Iraq. Xıd mathlone du camaydan, mıştawtafle u rişono du gabo du Huyodo d’Bethnahrin Athroyo-Yusıf Yacqub Matti, u notarrozo gawonoyo du gabo d’Bethnahrin Demoqratoyo Romio Hakkari, u qoyumo catiqo bu parlamento du Iraq Josef Sliwa cam menyono ma sicotho mtaybone du lumodo dsımwolın meqım qroytotho leşan dmişatıs qlime bu Iraq.

Bu lumodano dımtayıb bu nişo “i federaliye u şroyo’yo”, a mıştawtfone tlıblın dmişatıs qlime la hiğmınwotho dişe du Iraq, beynothaye Ninwe, Salahaddin, Anbar, Diyala u ğer hiğmınwotho Iraqoye lfuth a qonune du nomuso esonoyo du athro.Ba mamle dsimi ma hadire, mahkelın cala dyoşe dıkmdawmi cala hiğmınwothathe, u aydarbo kminase dmıkbış u sebyono da comurathe u dmıçbori dmatici l’agenda nuxroyto.

Ba mamlathe, a hadire mawdaceste du şekolo da qlime kımathıl u darbo ihidoyo du furqono mi aykanoyutho casqo dıkcayşi ba hiğmınwothathe. Camgabıdathe, a malolo mawdaclın du lumodano mtayıb mi celtho da qetre dhani ışne latimi calıhdode dlo şroyo dilonoyith ba hiğmınwotho mescoye, du taymno udu garbiyo du Iraq.

Bebzabno, a malole mawdaclın dhınne kımbahsi cal qlime federaloye di mdabronutho lfuth a mluwe da 116, 117, 118, 119, 20 u 21 du nomuso esonoyo du Iraq, u makadlın dıkrufdi dmişatıs qlime calu asas di hiyoyutho tawdithoyto yaste umthoyto. U rişono du gabo d’HBA Yusuf Matti bu mamlo dsımle, makadle du darbo ihidoyo du şroyo da qetre da hiğmınwotho dmişahılfi l’qlime’yo, lfuth a thumathe ducdo uba gawne umthoye u tawdithoye mşahılfe dıkhoyın ebaye.