Zaporitza prison, Ukraine. Image: Ukrainian Oresident Wolodomir Zelensky Telegram
29/07/2025

Rusya haçimo cal hbuşyo b’Zaporitza, qtil 17 hbişoye

Athmıl b’lalyo sımla Rusya cuqobo calu hbuşyo di fnitho d’Zaporitza dkıtyo bu taymano madınho d’Ukraina. Bu hçomano qtil 17 hbişoye wu bınyono wa bote dkıtwın qariwe lu hbuşyo, hzelın husrono rabo. Me gabo hreno u rişqutno d’Ukraina Zelenskij, mhanele u rişono Amerikoyo calu zuhoro dhuwle l’Rusya bi sbutho du qrobano. 

29/07/2025

ZAPORITZA, Ukraina — Lfuth mşalo bi rişqutnutho d’Ukraina Andriy Yermak, bu hçomo dsımla athmıl Rusya calu hbuşyo dkıtyo bu tayman madınho du athro, qtil 17 hbişoye uhol 80 hrene mçarhi. U ajans da tebe d’AFP mahıtle u mınyono da qtiloye 20 farsufe. U hbuşyo wa bote dkıtwın qariwe lu bınyonano’ste hzelın husrone rabe.

Bu mamlo dsımle Yermak athmıl b’lalyo mırle; Rusya sımla hawbo hreno du qrobo cal Ukraina. A hçomani d’Rusya lıkolın, elo dlo mitaklıyo Rusya. U rişono Putin wu rejimayde, klozım dmitahıt tedbire momunoye u folhoye aclaye leşan dlo qudri dımdawmi u qrobano. U hçomano d’Rusya sim kmo şoce bıthır mıd u rişono Amerikoyo mşahlafle u siqumo dmahıtwole qum Rusya, leşan dmaklıyo u qrobo b’Ukraina.

Donald Trump mbayanwole heş bu şuroyo du yarhano, d’Rusya klozım dmaklıyo u qrobano holu yarho d’İlül dıbqamuthayna leşan dmımte l’qyomo du şlomo cam Ukraina. Dloste, gıdmahtowa Amerika gumruk d’100 ba mo calan athrawotho dıkzawni nafto me Rusya. U siqumano ucdo manqıs l’belhude beyn 10-12 yawme.

Trump athmıl casriye mırle; Gıdmanqasno ma 50 yawmani dhuwoli l’Putin, cal dkodacno heş mucdo u funoyo mın gıdhowe. Hawili fsoqsabro rabo me Putin u calathe gıdmanqasno u zabno du ultimatum dmahıtwoli aclaye, cal dlaw fayış celtho dnutrina heş l’funoyo.

Calu teqşiyo du hbusano d’Trump mqabıl d’Rusya, u rişqutno d’Ukraina Zelenskij mqadamle tahınyotho lu rişono Amerikoyo u mırle; İ klaytathe d’Trump qrıhto ubı fusqono kamilo’yo u mahto tam bu zabnayda. Elo u tahlufo du rişono du Mawtbo di Mşaynutho d’Rusya Dmitrij Medvedev mfaşaqle u ultimatum d’Trump xıd masrahto hreto mqabıl d’Kremlin-dlıkmakiwo ğalabe rişe ma mamlani. Bebzabno Medvedev mawdacle, dkull ultimatum hatho-gzomo’yo u dawse hreto’yo l’qrobo beyn Amerika u Rusya.