Sim hçomo calu qlimo d’Deyr Ezzor bu madınho d’Suriya 

DEYR EZZOR – B’Deyr Ezzor dıknofıl bu madınho d’Suriya, hawi adyawma nişo l’hçomo d’tayosto dlo pilot dıqtil ebe 4 farsufe bu falqo du qlimo dıkmisım u duyoqayde ma grube mzayne du İran.   

Mabuce du macırbo bi maqırhonutho dhulın lu froshezwo d’Alcarabiya, mawdaclın du hçomano dmıdle nişo a zayne da İranoye, sim me Amerika bi zdirutho dcam İsroyel. Bebzabno, i Mşatasto  da zedqe noşoye d’Suriya mawdacla du hçomano sim cal cambar da soruhe da İranoye, ucal qamyon matcıno zayne.   

U mdabrono di Mşatasto Rami Cabdılrahman, mawdacle du cambar dımfarqıc beyn da bote wu medano naqla hreto kım’akıd da qamyone dıkşıfci ma thume du Ciraq l’Suriya, kınuqli zayne la grube İranoye bu telolo du nqolo  d’muklo.   

Lfuth hın sohude, belhude b’Deyr Ezzor kito hedor 15 alfo farsufe ma grube mzayne du Ciraq, Afğanoye u Pakistanoye dkıtne noqufe du İran. A grubani markıwi bi mdito d’Albukamal uhul Deyr Ezzor u Almayadin ub’fenyotho hrene bu madınho d’Suriya.