Sim şalyuthzeyno bu athro d’Libya

U Mawtbo di rişqutnutho di şultonutho d’al Wefaq d’Libya mawdacle, dmaklın a taxtuşe u sim şalyuthzayno banarcotho d’Libya kulle.

 Bebzabno, i şultonutho d’al Wefaq sımla qroyto dmisomi a guboye di rişqutnutho wa guboye du parlamento du athro bu yarho d’Odor bi şato dıbqamuthayna. I maqırhonuthathe, bı fsihutho mıstaqbılo me Emwotho Mhaydotho u me Mısır.

Bi maqırhonutho dıfriso athmıl mu Mawtbo di rişqutnutho di şultonutho Athronoyto d’Libya dıkmirayşın mu rişwazire Fayez al Sarraj, mawdacle dsim şalyuthzayno u dmaklın a cuqobe folhoye kulle banarcotho d’Libya. Cali maqırhonuthateste, Emwotho Mhaydotho u Mısır bı fsihutho mıstaqbelın u tebano di şultonutho d’Al Wefaq.

Bi egartho dıfrısle u rişqutno Mısroyo Abdel Fattah al Sisi bi dafayde du Twitter mırle; matilan u tebo di şalyuthzayno u bı fsihutho mıstaqbelan. Hathe dawse ulsoytoyo leşan u şroyo du krizano bu darbo folitiqoyo b’nişo du camo d’Libya naqla hreto dmarkıw i şalyutho wi nihutho bu athro.

Bi maqırhonuthathe d’al Wefaq mawdıcste dsim qroyto, dmitabde u maşıqlo da guboye di rişqutnutho uda guboye du parlamento du athro dıkmıntır dmisomi bu yarho d’Odor bi şato da 2021. U rişono du parlamento saqıbloyoste, tlıble ma gabe kulle du athro, d’matici li şalyuthzaynathe bu taro di aykanoyutho harıwto du momuno u du virus d’Corona.

U rişono du parlamento saqıbloyo Aguila Saleh mırleste; İ şalyuthzaynathe, gıdmaqimo a marhıbone wa ğrobe msalhe kulle u gıdmimodi a zayne menaye u bebzabno, gıdmitaqimo i mudaxala nuxroyto dkito bu athro. Turkiya, ha man athrawotho rişoye dımşadarle folhe u marhıbone d’Suriya l’Libya’yo u kmitawdıc dkito adyawma hol 17.420 marhıbone d’Suriya b’Libya; beynothaye 350 dkıtne laltah da 18 eşne.