Al Kazimi fayıt l’Basra i duktho da tagliyotho dkımdawmi eba

Baroyo bıthır mıd dacır u rişwazire du Iraq Mustafa al Kazimi me Woşington d’Amerika, nahıt bi mditho d’Basra dhani zabno kımdawmi eba a tagliyotho, a taxtuşe wa suikaste da farsufe hfite.

 Bu mamlayde al Kazimi mzaharle a grube wa farsufe dkıtne bıthrıd da qatlani da farsufe hfite, dıgmıkrıx aclaye u gıdmitawfıqi lqum di kinutho.

U rişwazire du Iraq Mustafa al Kazimi dımkamele i socuruthayde l’Amerika, bu dcorayde lu athro şafıc baroyo li mditho d’Basra camu waziro di gawoyutho Othman Al Ğanimi. Bi socuruthathe l’Basra, abıc u rişwazire Iraqoyo dhoze i aykanoyutho di mditho bıthır ma taxtuşe dhawın beyn da mtagliyone u da hayle di mşaynutho u da htofe u da qatle da farsufe hfite.

Yawme dı cruto mafıtwole u waziro di gawoyutho al Ğanimi u plan di mşaynutho leşan dmiqafın a hayobe wa ğrobe dıkqutli a farsufe hfite; beynothaye Reham Yaqob. Bıgawe du planano, kmıbceste dmitahıt ido cala zayne lo qonunoye dkito beyn da comure, da farsufe dkımzabni gelone mtanwone u ğer hawbe hrene dkito bu athro.

Cala qatlani da farsufe hfiteste, a mtagliyone kfixiwo la zabuqone u tlıbwolın dmiqafın u dmihaşwi a hayobe u sımwolın qroyto lu parlamento, dmagle cala eşmone da hayobe dıksaymi a suikastani. U rişwazire al Kazimi bıthır mıd mati l’Basra, sımle mamlo u huwle şudoyo dgımjazın a hayobe dıkqutli a farsufe hfite.

Bıthır mi ytawto dhawila cama mşale di mşaynutho d’Basra mawdacle, da ğrobani kmaşın hani zabno camle marhıbone mqabıl da mdinoye u kımşakli bu şıkılano, qento jıddi la Iraqoye kule. Al Kazimi mırleste; Bi socuruthathe i dilonoyto dsimolan l’Basra, kımawdena dılo qadırina dımsaytırina u camo wi mşaynutho di mditho.

Al Kazimi mırle; uşwolano da zayne lo qonunoye wa qetre dkito beyn da caşıryotho lıkmitaqbıli u klozım dmisafın cal qariwo. Camathe kulaste, lıkmaqbılina ayya mudaxala nuxroyto la sebwothani a gawoye d’Basra. I mdabronutho di mditho bi methcadronutho di şultonutho gdımsafın aşwolani camhıdode.