Sim taglitho qumi rişizgadutho d’Amerika b’Beyrut

Athmıl dkıtwe u yamo şatonoyo di hirutho d’Amerika, u camo Lebnono’yo dkıtle klayto cami qrayto d’Amerika bi sbutho d’Lebnon, sımle taglitho qum di rişizgadutho d’Amerika dkıtyo b’Beyrut u tlıble dmitawfiq u Hizballah xıd haylo folhoyo me Lebnon. 

 Bi maqırhonutho dhule u notarrozo du gabo du Huyodo Suryoyo Tibeloyo Mişel Mallo mşayele u mırle; Hayko kito athro, dkıtle tıre gayse mşahılfe?.

Bi taglithathe dsimo qariwo lu bınyono di rişizgadutho d’Amerika b’Beyrut, a mtagılyone tcınwolın othowiye d’Lebnon u d’Amerika cal katfaye u mazıcqiwo u talabathe bnişo d’Amerika manıhto la haye u qonuno da 1559. Be bzabno tlıblın u snodo d’Amerika dımcadro u athro, lfuth a maqırhonwotho dsımlın a mşale Amerikoye bi sbutho d’Lebnon.

Bhaq di taglithathe u notarrozo gawonoyo d’USUP Mişel Mallo mırle; Ahna lıkıbcina zayno b’Lebnon, star mu zayno da haylawotho di mşaynutho du athro udu gayso Lebnono’yo. Layto athro bıbritho dkıtle 2 gayse mşahılfe. Layto athro bıbritho dkıtle barmothoyo bu darğo qamoyo u bu darğo trayono. Layto athro dkıtle dayono l’Lebnon u dayono li şultonutho d’Lebnonoyto.

Mallo mırleste; U şuhlofo d’Lebnon klozım dhowe me lalcıl mu rişo du athro. U qetro d’Lebnon qetro folitiqoyo’yo dıkdocır l’meqım 10-15 eşne u ahna xıd gabo du Huyodo Suryoyo Tibeloyo kımmina; I sbutho d’Lebnon latyo sbutho du kafno elo sbutho folitiqoytoyo, u qetro di mdabronuthoyo wu qetro du zayno baroyo dlatyo ruşmoyo bu athro. Ahna kımmina, klozım dhowe ha gayso ruşmoyo Lebnonoyo. Ahna ksundina a fusqono tibeloye dkito.

Ba maqırhonwotho dhulın amtagılyone kulle, tlıble du haylo du Hizballah dmimıd u zaynayde mene u dfoyış u gayso ruşmoyo du athro bi mdabronutho di mşaynutho da Lebnonoye kulle. Bu yawmano dkıtwe u yawmo umthoyo d’Amerika, a Lebnonoye dıksundi i maqırhonutho d’Trump mqabıl Hizballah, mahwelın i klaytathe qum du bınyono di rişizgadutho d’Amerika dkıtyo b’Lebnon.