Surto: Rudaw
18/08/2025

Sim taglitho rabtho b’Sweda ktilbo mdabronutho yothoyto

Bu calway “ahna gdımbaynina u qadar d’ruhayna”, ba mowat d’mtagılyone layimi bu wahdo d’Alkarama bi mditho d’Sweda bu taymno d’Suriya, ub’qaşyutho krıhlın a’gunhe du cnufyo admonoyo dhawınwo bhaq dıththe ma haylawotho dı Darımsuq uma noqufaththe bu yarho dı Tamız dşaficina, udqtil ebaye zıd m’1600 farsufe.

18/08/2025

SWEDA — A’mtagılyone dlayimi bu wahdo d’Alkarama bi mditho d’Sweda yawme d’Şabtho dşaficina, tcınlın bidothaye an’othwotho da Druz udı İsroyel wa surotho du rişono ruhonoyo da Druz d’Suriya şex Hijmat Alhajari, uba slogane dmazcaqlın mırlın “Suriya hirto hirto… Aljolani tro nofıq l’larwal”. 

Ba lohiyotho uba plankarte dıtcini ba n’idotho hawxa kthew ebaye “u zedqo di ctidutho zedqo mqadşoyo l’Sweda… ktılbina dmıftıh koridor noşoyo… mawfequ a’haylawotho gawonoye di mşaynutho ma qıryawothaydan”. 

Lfuth u ajans dı Frans Press u şutose gawoye du tboco froso, hdo athto mıdla duktho bu platform di taglitho, u tlıbla dmitahwelın şaryutho kamılto, u mırla “lıkıbcina lo mdabronutho yothoyto uloste sistem federaloyo. Ahna kıbcina şaryutho kulonoyto”. 

U mtagılyono Munif Raşid dkıtyo ma comure d’Sweda bi maqırhonutho dhule l’Frans Press mırle “adyawma Sweda mahıtla i klaytayda ulayimo bu wahdo d’Alkarama bu calway u zedqo di ctidutho. Hatheyo i klayto d’Sweda adyawma, u noşo laybe dsamlın sturyo cal du hçomo dhawi aclaye latwe kyonoyo”. 

Camgabıdathe, u mtagılyono Mustafa Sahnawi dkıtle ğensoyutho Amerikoyto bi maqırhonuthayde l’Frans Press mırle “ahna hani zıd m’yarho laltah du ambargona. Lo maye kito ulo kahrobo ulo ste mcadrınwotho noşoye. Ktılbina mu kenşo emwothoyo umu rişono d’Amerika Donald Trump dımcadarlan b’surhobo, udmıftohi a’koridore cal dkıtna sniqoye lkul mede la maye ulu muklo”.