Sim tahrazto dimcadronutho laşan d’Turcabdin

Bi yasifutho di awyutho d’6 şutose du cameydan sim tahrazto haytho b’Suroyo tv laşan i mcadronutho da qıryawotho du cameydan dkıtne b’Turcabdin.  U nişo di tahraztathe dmızwın makinat du tetfiyo di nuro la qıryawotho u dayrotho du cameydan dkıtne b’Turcabdin.

I tahraztathe mtaybo bıthır ma yuqdone di nuro dkowewo hani kımo ışne ba arcotho da qıryawotho du cameydan d’Turcabdin.

Mawxa 6 şutose du cameydan sımlın awyutho cam hdode laşan dmitaltım zuze dmızwın makinat dıkmatfın i nuro inaqa dı qudho ba arcotho da qıryawotho du cameydan .

Bu zabno dkıtwo i tahrazto haytho b’Suroyo tv athilan tebo dhawi yuqdono bi qritho d’Midın, iqritho d’Midın dkıtwola tanger du tetfiyo di nuro a clayme di qritho nafiqi u matfelın i nuro, u hathe mahwela mıqa ulsoyo da qıryawotho du cameydan dhowelın makina lruhaye hul dothın aradoyotho du tetfiyo di şıltonutho dıkgorış naqat ba şoce.

A şutose dımhayadwolın u haylathe cam hdode laşan a qıryawotho d’Turcabdin haniwın , U huyodo du quyomo da qıryawotho d’Turcabdin DETA , U huyodo da hudre Suryoye d’Almanya HSA  U huyodo othuroyo d’Urifi i mıscoyto ZAVD  U huyodo da mşihoye du madınho mıscoyo d’Almanya, camu huyodo da hudre Suryoye b’Turkiya SUDEF.

U mede dmhawele bi tahrazto u camo mqadamle i mcadronutheyde u mahwele i fsithutho dkıtwole d’6 şutose du cameydan camıhdode sımlın hawxa tarmitho camıhdode.

I tahraztathe dsimo hayo b’Suroyo tv matyo lu nişo dkıtwole metul du camo mqadamle b’İdotho ftihe xıd ksoyım kulnaqa ba tahrazyotho dıkmisomi laşan u snodo du cameydan.

Bi tahraztathe hın ma şutose tawdithoye u mdinoye mqadamlın u snodathe dmıdlın hın mane zwono d’nakinat cal ruhaye, u bebzabno hın yaqrothoste abici dobın u timo kamilo da makinat me gabruhaye.

Bu huthomo di tahrazto a rişone da şutose mqadamlın tawdiyotho lu camo dımcadarle u mıdlın  arınye dathın laşan dı dırşine mın tahrazyotho ğer dsaymi camhıdode xıd şutose du cameydan.