Ahfuxye u asturye mqabıl du fusqono d’Turkiya bi sbutho d’Ayasofya kımdawmi

U Huyodo d’Urifi krıhle u fusqono dmıdla Turkiya, bi sbutho du şuhlofo di bethcatiqutho d’Ayasofya l’masığdo.

 Bebzabno, u qoyumo bu parlamento d’Turkiya mu gabo d’HDP Garo Paylan dmawdacle du fusqonano, yawmo d’haşoyo la Mşihoye. U gabo d’AKP’ste mawdacle dgımkasın a surotho da Mşihoye b’Ayasofya bu zabno di slutho digsaymi a Maşılmone du athro.

 A wazire di baroyutho dan athrawotho hadome bu Huyodo d’Urifi, krıhlın u fusqono dmıdla Turkiya bi sbutho du şuhlofo di bethcatiqutho makthabzabnoyto d’Ayasofya l’masığdo. I klaytathe mbaynole u mşalo celoyo di mşaynutho udi siyase baroyto du Huyodo d’Urifi Josep Borell, bu knuşyo dımtayable athmıl bıthır mıd kamıl u knuşyo da wazire di baroyutho du Huyodo d’Urifi.

Borel mırle; U Huyodo d’Urifi khoze du qedomano d’Turkiya kmaqwe i fliğutho u klohe u tuxlono wu dialog beyn da gabe mşahılfe. Borell bışmıd da wazire di baroyutho d’Urifi sımle qroyto l’Ankara dıdıcro bu fusqonayda du şuhlofo d’Ayasofya l’masığdo, u dnıfqo moro li aykanoyutho di nuqaztathe i catıqto xıd bethcatiqutho bi mditho d’Stanbul.

Camgabıdathe, u qoyumo Armınoyo bu parlamento d’Turkiya mu gabo d’HDP Garo Paylan, mahwele u haşayde calu şuhlofo d’Ayasofya l’masığdo. Paylan bi maqırhonutho difrısle mırle; Hano yawmo d’hzinuthoyo la Mşihoye, u lkul man dıkmawde d’Turkiya athro mgawnoyo. U fusqono du şuhlofo d’Ayasofya l’masığdo gıdtore tathir rabo cala Mşihoye d’Turkiya ucala Maşılmone b’Urifi. Paylan mawdacleste d’qadışto Sofia remzo du makthabzabno catiro d’Turkiyayo, ubebzabno qubtho rabthowa lkull noşo.

Megabo hreno, u malolo du gabo d’AKP Umer Çelik mawdacle da surotho nqişe d’Ayasofya gıdmikasın bı parda yaste bu bahro du lazer bu zabno da slawotho da Maşılmone. Çelik mırleste; A surotho di Mşihoyutho d’Ayasofya gıdmitaqım maclaye i parda, u gıdmıftıh u masığdo la socure ba zabne dlowe ebaye slutho, wu cboro gıdhowe magon.