Sim u yawmo şatonoyo du qtolcamo d’Soriya

Bu cohnutho du yawmo şatonoyo du qtolcamo d’Soriya, mtayıb hfitutho catırto bu qentrun hatho du şutoso d’Soraya di mardutho udu tboco froso bi mditho d’Caynkawa bu athro du Iraq.

 Li hfituthathe mıştawtafla taşdarto mu gabo du huyodo d’Bethnahrin Athroyo d’HBA, mşale mi şultonutho d’Arbil uma gabe u şutose mşahılfe du qlimo d’Kurdistan.

 U qentrun hatho du şutoso d’Soraya di mardutho udu tboco froso b’Caynkawa, sımle lumıhreno baytoyutho lıhfitutho catırto, bu duxrono da 51 ışne du qtolcamo d’Soriya bu garbiyo du Iraq.

İ hfituthathe mşarela b’hammış qatinotho d’şetqo cali ruho da sohde du camaydan dıqtiliwo b’şıkıl barbroyo bi qritho d’Soriya  ma haylawotho du gayso Iraqoyo i şato da na’1969. Bıthır mathe nqişo i sogitho athronoyto du qlimo d’Kurdistan wi sogitho d’Bethnahrin du şutoso d’Soraya.

Bıthır mıdmaqıth 39 şamce cali ruho da sohde di qritho d’Soriya, sim u futoho du qentrun hatho du şutoso d’Soraya mu wakilo di wazirutho da sohde bi şultonutho d’Arbil Pervan Hamdi, ube bzabno sim u futoho di methhawyonutho da surotho da sohde d’Soriya wa medone dıkmıstacımliwolın ba hayaththe a’yawmonoye. U glohano sim u futohayde mu rişono di sictho şritho da zedqe noşoye bu qlimo d’Kurdistan Diyaa Bıtrıs.

Camgabıdathe, u mdabrono di dayira du otopsi d’Arbil Yasin Kerim hule mawdconutho rwihto cala medone dıkmıstacımliwolın a’sohde d’Soriya u dıfris i naqla qadmoyto b’Caynkawa, ubebzabno mahkele cali duktho dhawi eba u qtolcamo wa fulhone dsımla i dayira du otopsi dmaglela cali hiyoyutho da şlade da sohde d’Soriya.

İ hfituthathe hthimo ba mamle dsimi mi mqadmonitho di tahrazto Viyan Jalal, u rişono du şutoso d’Soraya Nawzad Bulıs, u rişono di sictho şritho da zedqe noşoye Diyaa Bıtrıs, u wakilo di wazirutho da sohde Pervan Hamdi, ubi harayto dkulle sim mamlo mu notarrozo di knuşto Iraqoyto b,’Amerika Hamid Murad.

Li hfituthathe mıştawtafle u rişono du gabo du huyodo d’Bethnahrin athroyo d’HBA Yusıf Yacqub Matti cam taşdarto mu gabo, u mdabrono di qastra d’Caynkawa Rami Nuri Seyawiş, u mşalo du ferco d’Caynkawa du gabo Demoqratoyo d’Kurdistan, u menyono dı mathlone dı tukose mdinoye u tukose hrene Zaradaştiye.