Sim u zawho du futoho du bınyono di Bethmardutho d’Arkah

ARKAH, Tur Abdin — Meqım 2 yawme, a comure di qritho d’Arkah sımlın baytoyutho l’mınyono celoyo mu camaydan d’Turabdin ume Urifi dhadiri u hago du futoho du bınyono di Bethmardutho d’Arkah. U Hudro du Quyomo udi mcadronutho di qritho d’Arkah mşadarwole zminutho lu camaydan dmıştawtıf acmaye bu zawho du futoho du salonano.

Bu dumyano’ste, mtayıb u hago 17 bu yarhano b’mıştawtıfonutho celoyto d’rabe u nacime mu camaydan du qlimo umi golutho. U hasyo di marcitho Mor Tematheos Samuel Aktaş’ste bu mamlo dsımle, mhanele u tacbo rabo dhuwlın an Arkahoye leşan dımhafdi i mardutho Suryoyto bu futoho di Bethmarduthathe.

Bi hfituthathe’ste mşalo mu Hudro du Quyomo d’Arkah huwle mawdconutho cali tarmithathe wu nişo dkıtte bu dactith. Bu hagano dmaczımi a hadire b’muklo u ştoyo, u yawmo şafıc b’fsihutho ubu zmoro u raqdo qum du bınyono hatho. U futoho di Bethmardutho d’Arkah, remzo hreno’yo lu ağono dkobe u camaydan leşan dımhafıd i hiyoyuthayde wi yortuthayde bu athro dan abohotho.