Syriac Youth mkamele i maşrithayde di claymutho bu athro d’Swisra

SWISRA — U şutoso Syriac Youth tlotho bu yarhano mabdele i Maşritheyde di Claymutho du qayto bu athro d’Swisra. Me dukotho mşahılfe mıştawtafle zıd me 40 Clayme u Claymotho du Camaydan beyn 15 u hul 20 ışne. 

Ba yawme qamoye di maşritho ba Turgome u bu Workshop dsimi calu Makthabzabno du camaydan qadiro i claymutho dyulfo u d’cumqo bu dacbarayda u hawila surto rwihto u latımto cali yortuthayda. Ba şuwole “man na?” “Mayko na?” u “min na?” Hiw darbo lu Kroxo dcala funoye bu kthowo dışme “u Makthab zabno da Suryoye”.  

Bebzabno, hawi tuyole frişe, baynothye u mazlo li dayro mşamahto dcalu Turo. camu lqoyo di rişdayrayto di Dayro, hawi ğalabe mawthrono. I claymutho msalela camehdode ba tre lecze macerboyo u madenhoyo i Abun d’Başmayo, u tlıbla Sabro u şushoto lu camaydan bu athro d’Bethnahrin. U tuyolo hreno hawi u kruxyo bi sfitho u halxo bu turo. Hawille a clayme u a claymotho Mkono ba grube mşahılfe d’simi, dsaymi camıhdode nuqoşe u maqeblonwotho li dafo d’Syriac Youth. 

I maşritho mdawamla hul 9 bu yarhano ba duroşe dcala qtolcame dhawın calu cameydan u Suroyo udilonoye kle calu Sayfo. I claymutho sımla workshops u 7 bu yarho ba şoce d’casriye, u kohno di cito d’Madınho d’Othuroye qaşişo Lenar Kakjuna maqımle teşmışto cala ruho da sohde du Sayfo udu qtolcamo d’Simele, u huwle fagro li claymutho bi Maşritho. Bıthır mi slutho sim halxo şalyo cam şamce u kul claymo u claymtho mahkelın a’reğşathte calu Sayfo. 

Ba yawme haroye, mahke cali tarmitho di claymutho u calu kthowo du makthabzabno u cali dafo d´SYRIAC HISTORY. Drish camıhdode aydarbo kiba i claymutho miştacyo u dawrayda bu froso du maktabzabnaydan, u dmıflıh laşan di hdoyutho du cameydan. 

bu huthomo di Maşritho mido i hzayto di claymutho kula, u mawdacla dkıtyo hadırto dmaydo duktho bu şutoso di Claymutho d´SYRIAC YOUTH. U camgabıdathe, mtayıb lalyo marduthoyo dımqadım ebe masrahyotho cam raqdo u muklo u ştoyo.