Taşdarto Amerikoyto sımla socurutho li arişkayto du Iraq Boğdod

Taşdarto Amerikoyto bi rişonutho d’Brett McGurk dkıtyo u kordinatör Amerikoyo dcalu Madınho Mescoyo ucalu garbyo d’Afriqya, sımla socurutho li arişkoyto du Iraq Boğdod.

İ taşdartathe, hawila ytawyotho frişe camu rişwazire, camu rişqutno ucamu rişono du parlamento du Iraq u kalın dilonoyith bu droşathe, cala esore stratejikoye ucalu groşo da folhe Amerikoye mu Iraq.

U rişwazire du Iraq Mustafa al-Kadhimi, mıstaqbele athmıl taşdarto me Amerika, dımrayşıno mu mathlono catiqo du rişono Amerikoyo bu koalisyon Emwothoyo Brett McGurk. İ diloyto di taşdartatheste, dıkmathlo baroyo i şultonutho du rişono Amerikoyo Joe Biden’yo u hathe inaqla qamayto’yo d’Biden kımşadır hawxa şıkıl d’taşdarto lu Iraq.

Brett McGurk-dkıtyo ucdo u kordinatör Amerikoyo dcalu Madınho Mescoyo ucalu garbyo d’Afriqya wi taşdartayde dkitoste bıgawa ğer mşale Amerikoye; beynothaye mşalo mi wazirutho di baroyutho, mi wazirutho du sutoro u mşalo dcala şwole du Madınho Mescoyo, laqın’ste u rişqutno Barham Salıh u rişono du parlamento Mohammed al Halbousi.

Ba ytawyothani drışlın mınyono d’sebwotho frişe; beynothaye a droşe haroye dkowın calu dialog stratejikoyo dbeyn Amerika u Iraq, u groşo da folhe Amerikoye mu Iraq, u kordinasyon wi methcadronutho dbeynothaye bhaqle frişe. Bi maqırhonutho mşawtafto dfriso cala ytawyothaniste mawdıc, d’lfuth u haylo dkıtle u gayso du Iraq, i wolitho d’Amerika udu koalisyon Emwothoyo gıdhuwyo bıthır mucdo droşo folhoyo u mşawronutho la hayle Iraqoye.

İ taşdarto Amerikoyo d’McGurk, şafico adyawma lu qlimo d’Kurdistan leşan ytawyotho cama mşale du qlimo. Ba droşaniste kmıntır dmıkle cala esore stratejikoye beyn Arbil u Woşington, wa esore beyn Arbil u Boğdod uğer sebwotho.