Taşdarto me DEM laqyo u rişqutno dı Turkiya Erdoğan b’anqara

ANQARA — A’tre hadome di taşdarto d’İmrali du gabo dı DEM parti (perwin Buldan u Midhat Sinjar) laqın athmıl u rişqutno dı Turkiya Rejeb Tayeb Erdoğan bu qentrun di rişonutho dkıtyo bi erişkoyto d’Anqara. 

Bi ytawtathe, i taşdarto d’İmrali mahwela a’hzayotho wa renye dkıtla bi sbutho du maşıqlo hatho du şlomo, u mşalatla ste bahro cala sebwotho dgıdmimodi li ido bu dactid. Bu knuşyano dkıtwe sxiro lu tboco froso, i taşdarto d’İmrali bu buyono dıfrısla m’akadla calu sebyono dkıtlın a’tre gabe dımhalqi dawsat laşan du maşıqlo du şlomo b’Turkiya. 

Lu knuşyano dımdawamle şuctho, mıştawtafle mşale rabe bi şultonutho dı Turkiya baynothaye u rişono du şutoso da n’istixbarat du MİT İbrahim Qalın wu tahlufo du rişono du gabo d’AKP Afgan Aala.  

U knuşyano athi luhwoyo bu zabno dhın taşrore du tboco froso maglelın liholo d’grub ma mharbone di PKK dıkmişakıl m’20 hul 30 farsufe gdımhalqi u zaynaththe ba kmo yawme dıbqamuthayna b’zawho dgıdmisım ba thume di mdabronutho d’Rabrin bi hiğmonutho di Slemaniye bu garbiyo du Ciraq. 

Bu tarano, u huyodo da kenşe d’Kurdistan di KCK mawdacle adyawma dhawi şuhlofe bi tahrazto du teslimo du zayno da mharbone di PKK, mi celtho da şartat di mşaynutho. KCK bu buyonayde mırle “u zawho lıgıdmıfrıs hayo, ulıgıdhodarle şutose du tboco froso, elo gıdmiqayıd u zawho b’şaşe rabtho dgıdmitahto b’dutkho qaruto, ubu şıklano gıdmitahwe aftho la gelyunore dqathlın mawdcınwotho”.