Taşdarto me qoyume Franşoye, sımlın socurutho li qoyumtho du qtolğenso dan Armınoye b’Yerevan

YEREVAN — Taşdarto Franşoyto dıkmişaklo me qoyume dkıtne bu Ğrob da Hawrone bu senato d’Fransa, sımlın socurutho li arişkoyto d’Armenia. I taşdartathe dkıtwa bi rişonutho du qoyumo Gilbert-Luc Devinaz u Vladimir Vardanyan, sımla’ste socurutho li qoyumtho du qtolğenso dan 1915.

Bi socuruthathe i taşdarto mahıtla klilo d’warde qum di qoyumtho da Sohde du qtolğenso dan 1915 u kalın qatinto d’şetqo cali ruhathe. Bıthır i taşdarto şafico li bethcatiqotho du qtolğenso dan Armınoye u karixi eba. I taşdarto laqyo u rişono du parlamento d’Armenia uba droşe dhawın beynothaye, kalın cala 30 eşne da esore diplomatiqoye dkito beynothaye.

I taşdarto Franşoyto u rişono du parlamento Alen Simonyan hawilın’ste bıthır droşe cali sbutho d’Qarabax wi krih u qrobo dımdawamwole beyn Armenia u Azerbaijan 44 yawme ba 2020. U rişono du parlamento mawdacle u sabro dkıtle, d’Fransa dhuwyo sanıdto ba fulhone du tedciro dan Armınoye dkıtne hbişoye u dmınfıq moro li yortutho makthabzabnoyto d’Armenia b’Qarabax.