18/05/2022

Tebe b’qfisutho: u hasyo d’Mawsal hadir bu futoho du park b’Caynkawa, knuşyo mawtbo da citotho b’Mısır, u xer

KNUŞYO MAWTBO CİTOTHO B’MISIR – Bi mtaybonutho d’fatıryarxo u mathlone du Mawtbo da Citotho du Madınho Mescoyo, sim knuşyo bu athro d’Mısır. Bu knuşyano i qadişutho du fatıryarxo di cito Suryoyto Orthoduksoyto Mor İğnatiyos Afrem II mqadamle mamlo u mahkele cali ulsoyutho di mhaydonutho da citotho dcamhıdode.

HASYO MAWSAL HADIR BU FUTOHO PARK ANKAWA – Bi mtaybonutho du cameydan d’Caynkawa, d’mşale tawdithoye udu qlimoyo, sim u futoho d’gantho camonoyto rabtho bi hiğmonutho. Mawdıc di ganthathe’ste kmıhşowo i gantho rabtho d’Ankwa kula.

3 BNOTHO MU CAMEYDAN QTİLİ B’GEDŞO AMERİKA – B’gedşo d’ radayto dhawi bu athro d’Amerika 3 bnothe mu cameydan mfayaclın a hayathe. Bu gedşano dhawi bu darbo msarbo da radoyotho  d’Los Angeles d’Kalifornya a bnotho mfayaclın a hayathe. A 3 bnotho dımfayaclın a hayathe İvon Alyas Jacba, Yasemin George Jacba, u Jenifer Mwafq Dağır ne. Lfuth i mawdconutho dıfriso bi dafo du nawlo di cito Adyoma gıdmitaqıbli a buyoe bi cito d’Mor Gewargis b’San Fernando.

Cal ışme di mdabronutho d’Suroyo tv kımqadmina abuyoyeydan la yaqrotho da tlıth bnotho du cameydan u kimmina Alho maşwelın malkutho şmayonitho.

FUTOHO CİTO EWENGELYTO QAMİŞLİ – Sim u futoho wu qudoşo di cito  dmahıt ışma Mşiho u Bahro du Culmo bi mdito d’Qamişli. İ citathe dkıtyo du huyodo mşihoyo ewengeloyo masrıh ela kohno George Muşe.

MDABRONUTHO HFUXYO KLAYTO ERDOĞAN-NATO – Mdabronutho yothoyto du garbyo udu madınho d’Suriya frısla buyono lu ray dbritho, u mawdacla dıksaymo qrayto dmitaklın a siyasat bişe dıkmaşyo Turkiya mqabıl da came. U buyono di Mdabronutho komır; Ahna a came kulle dkıtna bu qlimo du garbay madınho d’Suriya, kımdawmina u qrobeydan mqabıl du tukoso marhıbono d’Dacış.

132 ALFO BNAYNOŞO MVAYCE HBUŞYE REJİM – İ Mşatasto da zedqe noşoye d’Suriya bi mawdconutho dfrısla, maglela du rejim d’Suriya holucdo, marfele mınyono ğalabe nacimo ma hbişoye siyasi dkıtne ba hbuşyayde. İ Mşatasto m’akadla, da mawdconwothani du reji bi sbutho du şbuqyo dhuwle, latle şroro.

HAYLE MŞAYNUTHO GAWOYTO ZUHORO CAMO – A Hayle di Mşaynutho di Mdabronutho yothoyto du garbyo u madınho d’Suriya, bi maqırhonutho dfrıslın mdagelın a mawdconwotho dfrisi u dımdace dsımlın cuqobe cal bote bi mdito di Qamişli. A hayle di mşaynutho mırlın; U mede dlıkmıfrıs ruşmoyith ba dafeydan, latne şroro u hani farsufe dıksaymi fıtne beyn du camo’ne.

QASAD MSIKLE 5 DACIŞ-CUQOBE CIRAQ B’MAXMUR – A Haylawotho d’Suriya Demoqratoyto, kımdawmi ba cuqobathe cala krılyotho da ğrobe marıhbone d’Dacış. Ba cuqobe haroye dsımlın bu qlimo d’Deyr Ezzor, msıklın hamşo marıhbone.

YURDNON HFUXYO TAGORUTHO GELONE MTANWONE – Bi mawdconutho dfrıslın a noture da thume d’Yurdnon mırlın; A hadome du rejim d’Suriya wa noqufathe du İran dkıtne b’Suriya, kımafiti gelone mtanwone u happotho du kaptagon mcala thumathe lıgawe d’Yurdnon. Bi mawdconuthathe a noture mawdaclın i kmoyutho da gelone mtanwone  dmacbıri lu athro uholucdo.