Trump mırle kıtwole tahrazto dqotıl u rişwazire d’Suriya Başar Alasad

U rişono d’Amerika Donald Trump bı qrihutho, mawdacle dkıtwole tahrazto du qatlo du rişqutno d’Suriya Başar Alasad.

 Trump bi maqıblonutho dsımle acme u froshezwo d’Fox News, mawdacle di tahraztathe lımafito la haye, calu du waziro du sutoro dmeqım Jeyms Matti rfıdwole u medano.

 Athmıl u rişono d’Amerika Donald Trump bi maqıblonutho dsımle acme u froshezwo d’Fox News, mawdacle bşıkıl qriho dkıtwole mabco dqotıl u rişqutno d’Suriya Başar Alasad i şato da 2017, elo u rişono du Pentagon bu zabnawo Jeyms Mattis nafıqwo mqabıl di tahraztathe.

Trump bu hjomo dsımle cali şaxsiye d’Mattis mırle “kıbacno dıqtalnowo Alasad, u laşan u medano mtayabwoli kul mede, elo Mattis labıcwo dsamwo u medano”. İ maqırhonuthathe d’Trump kımakdo i mawdconutho dırıfdiwole i şato da 2018 bıthır mdıfrisowa bu kıthowo du gelyunoro mşamho d’Waşington Post Pob Woodward dıfrıswole u kıthowayde bu ışmo “i zuctho: Trum bu Qusro Heworo”. Bu kıthowano Woodward frıswole u mamlo dı Trump dıtlıbwole mı Mattis dqotıl Alasad.

Bi maqıblonutho dsimo cam Trump bu froshezwo d’Fox News, makadleste d’Mattis latyo rabhaylawotho towo, u mawdacle dlımandamle qay dlıqtiwole Alasad, cal du mawto wa haye du farsufano masrene camu fusqonayde.

Trump mırleste “ıno mawdacwoli d’Alasad farsufo latyo towo, mawxa kıtwoli aftho du qatlayde ida dıbacnowo u medano”. Trump mıftakarwole bu qatlo d’Alasad, cal dıthımwo dsımwole hjomo b’zayno kimyawi cala mdinoye i şato da 2017.

Bi maqıblonutho dsimo acme, Trump mathkarleste dbıthır mi isticfa d’Mattis, Amerika qtila u rişono du tukoso marıhbono dı Dacış Abu Bakır Albağdadi i şato da 2019 wu rabhaylawotho du İran Qasem Sulaymani i şato da 2020. Cali sbuthathe Trump mırle “Sulaymani u Albağdadi ma marıhbone rabe dkulle ne dı britho. Albağdadi mşataswole Dacış u kobacwo d’bonewole m’hatho bıthır mdıqşicli u tukosayde”.