Turkiya kımdawmo ba hçome cala qeryawotho du cameydan bu Iraq

I barbroyutho d’Turkiya wa hçome dıksaymo cala fenyotho makthabzabnoye du camaydan bu garbiyo du Iraq kımdawmi.

U gayso kaboşo d’Turkiya ba hçome dıksoyım cala qıryawotho d’Nuhadra, kobe husrono la akore u kowe celtho dmitaxlın a qıryawotho du camaydan ma comurathe.

Athmıl naqla hreto, a tayisyotho folhoye du gayso kaboşo d’Turkiya, sımlın hçome barbroye cal qıryawotho dıknufli bi qastra d’Amidi bi hiğmonutho d’Nuhadra bu garbiyo du Iraq. U xıd kull naqla a hçomani hulın husrono momunoyo rabo la comure di duktho. Lfuth gelyunore bi qastra, a hçome d’Turkiya cali qritho d’Kiste ucali Çallık du camaydan heş kımdawmi.

U gayso kaboşo kobıc’ste d’bone qentrune folhoye bi fnitho bıthır mıd şafıc l’zıd me 9 kilomıtre lawğıl dan arcotho du garbiyo du Iraq. A gelyunore dıkmcaqbi a şuşote di qastra, mawdaclın da hçome Turkoye hulın husrono rabo lan arcotho da akore, uba casrowat d’qıryawotho dkıtne calu thumo d’Turkiya maxlın ma comurathe.

U rişono di sictho da esore baroye bu parlamento d’Arbil qoyumo Şirogo Merwis, bi maqırhonutho dhule, mawdacle di şultonutho du Iraq, i rişqutnutho wi sictho da esore baroye du parlamento du qlimo d’Kurdistan, krıhlın a hçome dıksaymo Turkiya calu garbiyo du Iraq. Merwis mawdacle’ste dıklozım Ankara dımyaqro a qonune Emwothoye u dşıryo a qetrayda lawğıl dan arcothayda.

Athmılste, u Mawtbo Umthoyo d’Bethnahrin-MUB bu buyono dfrısle lu ray gawonoyo, tlıbwole me Emwotho Mhaydotho umu kenşoyo Emwothoyo, dmahti klayto çıddi mqabıl da gunhe uda mudaxalat folhoye dıksaymo Turkiya ban athrawotho qlimoye, dilonoyith bu garbiyo du Iraq. MUB mawdacle’ste du camaydan dfayış bu Iraq, kmıqtıl, kımgalwe u kmişahılfo i demoğrafya da fenyothayde bi netiçe da hçome d’Turkiya calu garbiyo du Iraq.