14/05/2021

Azerbaijan kımdawmo u kboşeyda cala narcotho d’Armenia

Bu zabno da hayle d’Azerbaijan kımdawmi u kboşathe calan arcotho d’Armenia, sımle u rişwazire Nikol Paşinyan mamlo bu knuşyo du Mawtbo di Mşaynutho d’Emwotho Mhaydotho u tlıble dmisım hboso cal Azerbaijan.

Calu cborano d’Azerbaijan ba thume d’Armenia, u senator Amerikoyo Bob Menendez wu rişqutno d’Fransa mahwelın hfuxyo.

Athmıl a hayle folhoye d’Azerbaijan, mdawamlın dcubri lıgawe da thume d’Armenia. İ wazirutho du sutoro d’Armenia mawdacla, da hayle d’Azerbaijan cabiri l’Vardenis dkıtyo bu qlimo d’Gegharkunik u l’Sisian. Hani 2 yawme kımdawmi a hayle d’Azerbaijan bu kboşo dan arcotho d’Armenia wi şultonutho d’Yerevan tlıbla snodo mu Tukoso du Qyomo di Mşaynutho Kollektiv.

U tukoso mawdacle dıkıdorış ucdo i sbutathe me qariwo. Bu kboşano d’Azerbaijan ban arcotho d’Armenia, heş law taxtuşe elo mawdıc, dmacbır 250 folhe d’Azerbaijan lıgawe da thume Syunik d’Armenia. Bebzabno Paşinyan sımle athmıl mamlo bu Mawtbo di Mşaynutho d’Emwotho Mhaydotho u grışle u zuhoro calu provokasyonano d’Azerbaijan.

U rişwazire tlıble’ste da hayle Emwothoye dmaydi tedbire casye mqabıl da dyoşani d’Azerbaijan cali morutho d’Armenia. Camathe’ste Fransa dmawdacla u snodayda l’Armenia tlıbla mu Mawtbo di Mşaynutho dmoyıd inisyatif u dsoyım mescoyutho bi sbuthathe leşan dmışre u qetrano beyn Armenia u Azerbaijan.

U senator Bob Menendez dkıtyo u mşalo di Sictho da esore baroye du Senato d’Amerika frısle maqırhonutho u grışle u zuhoro calu kboşano d’Azerbaijan cala dukotho dan Armınoye u mırle; Hano dyoşo di morutho d’Armenia’yo wi ithuthathe d’Azerbaijan qento’yo u latyo qonunoyto. Calathe klozım i şultonutho d’Joe Biden dımdaxlo bi sbuthathe leşan Azerbaijan dımyaqro i morutho d’Armenia.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…