Turkiya kımdawmo dmaqwiyo u haylayda b’İdlıb

Turkiya kul dkothe kmaqwiyo ukmazido u haylayda bi fnitho d’İdlıb bu garbay macırbo d’Suriya.

 Turkiya camgabıd da folhe uda radoyotho dkımşadrolın l’İdlıb, markawlaste sistem da soruhe di mudafaca oyaroyto bi fnitho d’İdlıb.

 U gayso kaboşo dı Turkiya markawle bi fnitho d’İdlıb b’Suriya, sistem da soruhe Amerikoye di mudafaca oyaroyto (Hok MİM 23), bnişo dmaqwe u haylayde zıd bu garbiyo d’Suriya.

Lfuth i sferyawmo d’Alşarq Alawsat, ba surotho dıgrişi ma sahre sınci kmahwe da soruhani dkıtne Amerikoye markıwi bi maşritho d’Almastuma dıkrıhqo balhude hamşo kilomıtre mu taymno d’İdlıb.

Be bzabno, i mşatasto d’Suriya da zedqe noşoye mawdacla d’konvoy Turkoyo hatho dıkmişakıl m’25 radoyotho folhoye şafici mi nuqazto du thumo d’Kafarlusin, u maftelın fothaye lafi maşritho d’Almastuma. Ubu şıklano u menyono da radoyotho Turkoye dşafici l’İdlıb mu zabno dımbayanwo şalyuthzayno hamşo bu yarho d’Othır dşaficina uhul ucdo, mati l’3460 radoyotho.

Turkiya laşan dımthabto u kboşayda la fenyotho du garbiyo d’Suriya, kmazido u menyono da nuqazyothayda a’folhoye, ukımşadro ste zayne u mcadrınwotho lojestik b’şıkıl yawmonoyo uba olufe d’folhe l’İdlıb.

Hathe latyo i naqla qamayto dıkmarkıwo Turkiya sistem da soruhe ba n’arcotho d’Suriya. Meqım mathe ste i şato da 2018 markawola Turkiya soruhe (Hok MİM23) bi mditho dı Darıt Cizza bu macırbo d’Hlob.

Lfuth a’grube mzayne dıkmısnodi m’Turkiya, u terkiwo da soruhani b’İdlıb athi luhwoyo bnişo dmınfıq la hçome dkibın dmisomi mu rejim d’Suriya cala thume dı Turkiya.

İ sferyawmo d’Alşarq Alawsat bu tebo dıfrısla mawdacla du gayso kaboşo dı Turkiya şafıc li harake b’İdlıb ub’şıkıl dlıkmıntarwo, dilonoyith bıthır mi socurutho dsımwole yawme d’şabtho dşaficina u waziro du sutoro dı Turkiya Hılusi Açar lıhdo fnitho dıknıflo cala thume d’Suriya.