Turkiya kıqıtco a maye u kahrobo cala camoure d’Tel Tamır

‘Ba casro alfayo dıbnaynoşo dıkhoyın bi fnitho d’Tel Tamır u hedora, kmıhromi ma haye umu kahrobo ma hayle kaboşe d’Turkiya’. A melani du rişono zawgoyo du Mawtbo Mdinoyo d’Tel Temır’ne.

Bi maqıblonutho dsimo camu rişono zawgoyo Joan Mela Ayoub, mahkele cala hawbe ucala dyoşe dıkmaşyo Turkiya dıkturyo a bnaymothoye di fnitho dlo kahrobo udlo maye.

U ajans da tebe d’Hawar, sımle maqıblonutho camu rişono zawgoyo du Mawtbo Mdinoyo d’Tel Tamır Joan Mela Ayoub. İ maqıblonuthathe’ste frişo dilonoyith cala hawbe dıkmaşın a hayle kaboşe d’Turkiya wa marhıbonayda cala mdinoye di fnitho wu qtoco da maye udu kahrobo.

U rişono zawgoyo du Mawtbo d’Tel Tamır mırle; Bıthır mıd a hayle nuxroye dkıtne bu qlimo lo kımtanın, ba casro alfayo dıbnaynoşo dıkhoyın bi fnitho d’Tel Tamır u hedora, lıkmitahwelın lo haye ulo kahrobo ma hayle kaboşe d’Turkiya.

Ayoub mırle’ste; Mu zabno d’Turkiya kbışla i fnitho uholucdo, kımdawmo dturyo u camo di fnitho b’bsirutho rabtho da maye udu kahrobo. Elo ba zabne haroyani, qaşın zıttır u hani yarho, fayışina dlo maye-bu qaytano u şahuno. A comure dıkşotın maye ma gube’ste, kıtofelın kewe cal da mayani lıkmıştın.

Ayoub kali’ste bu mamlayde cala hayle dıklozım bu normal dım’amni i mşaynutho di fnitho, dlıksaymi i wolitho noşoyto dıknuflo aclaye wu Turkiya wa marhıbonayda kımaşqın u hbosathe cali Mdabronutho yothoyto bu qtoco da maye di nuqazto d’Alouk. Calathe klozım a hayle nuxroye dkıtne bu qlimo, dhowelın kordinasyon u dsaymi hboso cal Turkiya leşan dmaklıyo a hawbani dcala mdinoye.