14/04/2022

TURKIYA: U gabo di HDP mahwele hfuxyo mqabil du bnoyo cala qabre mkanşe dıkducri lu zabno du Sayfo dan 1915 b’Scirt

U gabo Demoqratoyo da Came-HDP mahwele hfuxyo mqabıl du fsoso dhuwla i şultonutho d’Turkiya lu tecmiro d’benyone cal qabre mkanşe dıkducri lu zabno du Sayfo dan 1915. Bu mamlo dsımlın a qoyume di HDP mırlın; “Hayna wujdan kobe fsoso dmitacmır bote cala garme da mithe-dlo sim buhono aclaye mu Sayfo hulucdo.”

14/04/2022

ANKARA/SIIRT – İ şultonutho d’Turkiya huwla aftho lu tecmiro di Nawale da Qasobe, dkıtyo duktho dkiba qabre mkanşe mu zabno du Sayfo hola zabne haroye da fayili meçhul u ğer qatle. Mqabıl du fusqonano dkıtyo mqabıl di noşutho, 7 qoyume di HDP azzın li duktho leşan dmahwın hfuxyo mqabıl du fusqonano u dsaymi qrayto lu kenşo dlo maqbıl u medano.

I şultonuto d’Erdoğan mşarela dmahto carqalyotho mqabıl da qoyume mu mazlathe du bethtawso d’Batman holi Nawale da Wasobe dkıtyo b’Scırt (Siirt). Cıl ma carqalyotho kulle, a qoyume azzın li Nawale u mşarelın dsaymi mamle la gelyunore wu laqın bu tecçizo ma powelıs, b’dumyo dgıdowe mede ğalabe rabo. Elo belhude a qoyume wa gelyunorewın bi duktho.

Bu mamlathe a qoyume mırlın; Layto lo wujdan u rahme b’lebe da farsufe dmıdlın fusqono dmitacmır benyone cala bethqbure mkanşe dıkdocır u matkthabzabnathe lu Sayfo dan 1915. İ qoyumto Meral Danış-Beştaş bu mamleyda la powelıs mırla; U mede dıksaymito mqabıl didan-latyo qonunoyoyo. A mşale dkobın u amro fawdo ksaymi, lo saymuto u medano metul dıkmıstacmlınxun u bıthır gıdmhalqınxun.

Bu zabno da qoyume di HDP abici dsaymi mamlo, a powelıs tfikınne, elo a qoyume mırlın, Ahna xıd gabo Demoqaratoyo da Came, lıktorina dmacmıritu bote, qusre u hawuze da maye cala garme da mithe dheş lo sim buhono aclaye.

Tro misim buhono u dmimodi a garme d’qariwo d’300 farsufe dkıtne harke bıthır tro mitacmır dukthathe. Qay layto dukotho ğer dmitacmır bote ebeye-bele, elo i şultonutho kubco dımkasyo cal caybo hreno u dluhyo u tethkar da qatle d’Turkiya.