U athro du İran mafırle satelit hatho lu Athir

U İran gıdmaslıq satelit hreno lu Athir. U nişo du satelitano, dsoyım buhone yulfonoye bu Athir’yo.

 Elo Amerika, mawdacla ilo thnihuthayda calu şedorano du satelit du İran.

U waziro du mtoyo bi şultonutho du İran adyawma mawdacle, dgımafiri u satelit hatho d’Zafar-awkith Zoxutho lu Athir, leşan dsoyım buhone yulfonoye. Holuzabno dıksayminawo a tebe, heş lo mafırwo u satelitano lu Athir.

U satelit gıdgorış’ste surotho leşan a buhone dcala zalzalat uğer gunhe du kyono u leşan u şuşoto di zaricutho bu İran. U satelitano dkıtyo 113 kilowiye, gıdsolıq bı surhobo d’530 kilometre i şoctho.

Bu yarho d’İlül da 2019, mnasewole u İran dmaslık satelit hreno lu Athir, elo u satelit lo qadırwo dı solıq u nafılwo mcal fothed fowde teknikoye. Elo Amerika mawdacla u ğamayda li tahraztathe du şedoro da satelite du İran lu Athir u mfaşaqwola u şedoro du satelit haroyo dmafıırwo meqım şato, xıd provokasyon.

Lfuth Amerika, u tesliqo da satelitani du İran, dyoşo da maqırhonwotho du Mawtbo di Mşaynutho d’Emwotho Mhaydotho da 2015’ne leşan u İran dlo mşawşıt i tahraztayde da zayne nukleer.