U camaydan kımgalwe ma qıryawothayde

Zıttır me 5 alfo yaqrotho mu camaydan mgalwelın ma qıryawothathe u zıttır me 55 citotho sxırlın a tarcathe bi netije du hjomo dsımle u gayso kaboşo d’Turkiya calu garbiyo du Iraq.

 Calathe, hın mu camaydan dıtrelın a qıryawothathe b’Nuhadra, tlıblın mi şultonutho du Iraq ume Emwotho Mhaydotho, dmaklın ahjomani dıksaymo Turkiya.

 A hayle du gayso kaboşo d’Turkiya kımdawmi u hjomathe cala mdinotho u qıryawotho mşayne du camaydan bu garbiyo du Iraq. Ahjomani naqlat kmisomi ba tayosyotho d’Turkiya, u naqlatste kmıhjım ba soruhe uba zayne yaqure, bi dacwa du nfoqo mqabıl du gerilla di PKK. Ubi netije da hjomani, mşarela i şalqa hatho di golutho du camaydan.

 Samira Hanna dkıtyo mu camaydan dıkcayşo biqritho b’Nuhadra, bi maqırhonutho dhula lu tbocofroso, mawdacla dıjbiro dutıryo i qrithayda d’Şranş mcal fothe da hçome d’Turkiya, wu ucdo kcayşo cami iqarthayda uğer yaqrotho hrene du camaydan bı aykanoyutho mahişonitho. Wu grışlaste u zuhoro cal 55 citotho dı sxiri ba zabne haroyani mi celtho da hjome dıksaymo Turkiya, u ba melani mdawamla; U hjomano kıgorış u zuhoro calu qento dıkloqın a Mşihoye di daşto d’Ninwe udi hiğmonutho d’Nuhadra.

 Camgabıdathe, Muayed Naysan dkıtyo mu camaydan di qritho d’Şranş, bi maqırhonutho dhuwle tlıble mi şultonutho du Iraq, me Emwotho Mhaydotho uman athrawotho dıbritho dmaydi tedbire msarhıbe, bnişo dmaklın u qrobo dkito, u dkolın b’fothe da hjome dıksaymo Turkiya calu garbiyo du Iraq.

Naysan mawdacle dkıtyo mdamro ma hjome du gayso Turkoyo cali qrithayde, cal dlayba ulo mharbono di PKK, u mırle; Ba hjomani i şultonutho Turkoyto dkıtyo tuxmonoyto kıbco djıbro a Mşihoye dtorın a qıryawothathe dkıtne bi hiğmonutho d’Nuhadra ubi mditho d’Mawsal, bnişo dmişahılfo i demoğrafya du qlimano xıdu mede dsımla Turkiya b’Cafrin bu garbiyo d’Suriya.