Hfuxye mqabıl da hjome d’Turkiya calu garbiyo du Iraq

I wazirutho di peşmarge di şultonutho du qlimo d’Kurdistan du Iraq, mawdacla dbu noquso 100 qıryawotho maxlın bı zabno d’30 yawme bi qastra d’Zaxo udı Alcimadiya, uba casrowat mdinoye qtili u mawqıdi a bıstonathe bi netije da hjome dıksaymo Turkiya calu garbiyo du athro.

 Me gabo hrene, mşalo Cıraqoyo catiqo mawdacle, du cboro du gayso d’Turkiya lan arcotho du Iraq, u nişayde dmahto ido cali mditho d’Mawsal yo.

U notarozo gawonoyo di wazirutho di peşmarga bi şultonutho du qlimo d’Kurdistan du Iraq Jabbar Yawer, mawdacle dhedor 100 qıryawotho maxlın kulonoyith ma comurathe b’zabno d’qariwo l’yarho bi qastra d’Zaxo udı Alcimadiya bu garbiyo du Iraq, bi netije da hjome dıksaymo Turkiya.

Yawer mawdacleste dmeqım mathe, 450 qıryawotho dkıtne calu thumo d’Turkiya maxlanwo ma comurathe, u mırle; Bi netije da hjome oyaroye udi naşfe dıksaymo Turkiya, ba casrowat mdinoye qtili, mawqıdi anarcotho wa bıstonathe u qtili a qatcathe.

Camgabıdathe, u malolo di sictho da esore baroye du tukoso du Kenşo Kurdistanoyo Zağros Hiwa, mawdacle dbu noquso 100 folhe Turkoye qtili ba taxtuşe haroye dhawın bu garbiyo du Iraq, ube bzabno mathkarle di PKK latla ithutho ba fenyothani dkibın comure.

Hiwa dmawdacle dkito ucdo qrobo qaşyo b’ruhqo d’300 kilometre calu thumo beyn du Iraq u Turkiya, ba melani mdawamle; U nişo d’Turkiya ba hjomani a haroye, dmacişo u hulmo di xilafa Cuthmanoyto ba dukotho dıkbışiwola meqım. A hjomani knıfli bu taro di tahrazto du kboşo di hiğmonutho d’Holob bu garbiyo d’Suriya wu kboşo di hiğmonutho d’Mawsal bu garbiyo du Iraq.

Me gabo hreno, u waziro catiqo di baroyutho du Iraq Hoşyar Zebari bi egartho dfrısle bi dafayde du Twiter, grışle u zuhoro calu qento geofolitiqoyo du cboro folhoyo d’Turkiya lanarcotho d’Zaxo, u mırle; U cboro du gayso Turkoyo, şuşoto geofolitiqoyo’yo dkibe qento rabo. U mede dlıkmathnıh a mamle da rişone Turkoye yo dkımdacın di mditho d’Mawsal falqo mu makthabzabno di şultonutho Cuthmanoyto yo.