U fatıryarxo di cito Suryoyto Ortodoksoyto Mor Afrem II mabdele socurutho l’Medyad

MEDYAD — Athmıl safrayto, i qadişutho du fatıryarxo di cito Suryoyto Ortodoksoyto Mor İğnatiyos Afrem Trayono cam taşdarto dıkmişaklo mı menyono ma hsayo da marciyotho dı Turkiya, d’Suriya udu Swed, sımlın socurutho lu qentrun di karxutho d’Midyat, u mıstaqıbli mu rişono di karxutho Waysi Şahin. 

Bu şuroyo di ytawtathe, u rişono di karxutho mahkele calu dawro dkıtlın a’Suryoye bi mditho d’Midyat dımcadarlın dfayşo i mditho mşatasto calu asas da gawne umthoye u tawdithoye mşahılfe, du şbuqyo udi ciyeşe mşawtafto. 

Bıthır mathe, i qadişutho du fatıryarxo mahwele i fsihutho dkıtle cal di mditho d’Midyat kıtla duktho dilonoyto b’gawıd dı Turkiya, u mırle “mi mditho d’Midyat uma qıryawotho d’hedora mgalwele ğalabe ma n’abne di citaydan, elo i masiruthaththe ebaye fayişo qwitho”. Mor Afrem Trayono mahkele ste calu cumqo du makthabzabno di cito Suryoyto wi catiruthayda i ruhonoyto b’gawıd di fnithathe, u mawdacle di dayro d’Mor Gabriel hawyo nuqazto la socure Suryoye dkothın mıbritho kula. 

Bıthır mathe, i qadişuthayde zırle i cito d’Mor Hadbşabo bi qritho d’Ciwardo, u maqımle eba slutho di teşmışto bi mıştawtfonutho d’menyono celoyo d’hsayo, kohne u şamoşe u kunoşo rabo dımhaymne. Camgabıdathe, i qadişuthayde karıx bayn da villat uda bote dıbnın m’hatho bi qritho d’Ciwardo, u zırle ste i cito d’Mor Şmuni dkıtyo bi qritho. 

Bebzabno, u fatıryarxo di cito Suryoyto zırle i cito d’Mor Yuhanon Dakfone bi qritho dı Mzizah, u tamo i qadişuthayde bu mamlo dsımle mqalasle i masirutho dkıtlın a’Suryoye camu cafro da n’abohothaththe, u hule la mhaymne i borukthayde i şlihoyto. 

Athmıl ste casriye, fatıryarxo Afrem mrayşanle i slutho du qurobo alohoyo bi dayro d’Mor Abrohom ud’Mor Hobel bi mditho d’Midyat, uli sluthathe hadır menyono celoyo ma hsayo da marciyotho dı Turkiya, d’Suriya, du Hınd udu Swed. 

U rişono di marcitho dı Turcabdin hasyo Mor Timothawos Şmuel Aktaş bu mamlo dsımle mahkele cala casqıwotho sagiye dşafici ebaye a’Suryoye di fnithathe, u grışle u zuhoro cala dawsat msimone dımhalqile u camo Suryoyo dmıştacele dawro ulsoyo bi fnitho. 

Camgabıdathe, i qadişutho du fatıryarxo bi koruzuthayde mahkele cali mıcne di mşablonutho lfuth i Mşihoyutho dkıtyo dbehnafşo, u makadle ste di mşablonutho amane yo dıklozım dmınfaqla moro laşan dmamtiyo camruha fire towe.