U huyodo Almanoyo du yulfono udi tarbitho, kobıc dmitahırgo i tawditho Maşılmonitho ba madraşyotho d’Almanya kulle

BERLIN — U huyodo Almanoyo du yulfono udi tarbitho VBE sımle qroyto dmibayın herge du tewlifo di tawditho Maşılmonitho ba madraşyotho d’Almanya kulle. U rişono du huyodo Gerhard Brand bi maqırhonutho dhule li şabake du tboco froso Almanoyo mırle “klozım dmitahwe mkono la mhaymne kulle dıdırşi a’tawdiyothaththe b’gawıd di madraşto, udmitahwelın mawdcınwotho cali tawdithaththe ucala tawdiyotho hrene”. 

Brand sımle ste qroyto la folitiqoye d’Almanya dmafiti u medano b’surhobo la haye, u mşaçcile dmarwıhi u taro du tewlifo di tawditho Maşılmonitho b’şıkıl dıktofe la madraşyotho d’Almanya kulle. Brand tlıble ste ma folitiqoye Almanoye dımbayni malfone u buçça dilonoyto, udbaroyo dmafiti la haye a’tedbire dıklızmi lu nişano. 

Camgabıdathe, u rişono du huyodo da malfone d’Almanya Ştefan Doll, mawdacle da herge di tawditho b’gawıd da madraşyotho gdımşakli haylo hreno mqabıl da hzayotho di tuhmonoyutho. Doll bi maqırhonutho dhule li şabake du tboco froso Almanoyo mırle “a’herge tawdithoye ba madraşyotho gawonoye dıkmiqadmi mı malfone mdarşe u ruşmoye mi şultonutho d’Almanya, kibın dımşakli haylo mqabıl du idyoloji tuhmonoyo dıkmınqıl lo yolufo mi iqartho yaste mi kampania di tuhmonoyutho dıkmisomo bu darbo du nawlo”. 

Lfuth hşowe lo ruşmoye, kmisım texmin dıkcoyış bu athro d’Almanya hedor d’5 malyune u 500 alfo Maşılmone.