U İran kımdawım dmaqwe ruhe bu athro d’Suriya

Cıl mıdıkmisım hjome u hboso emwothoyo calu İran laşan dgorış ruhe m’Suriya, elo naqla hreto kmahwe di şultonutho dı Taharn kmıştacyo cala hawle u latla mabco d’gurşo ahaylawothayda m’Suriya.

Lfuth i mşatasto d’Suriya da zedqe noşoye, u İran frısle grube hathe mu gabo d’Hizballa du Iraq bu mathıbro d’Almayadin bu madınho dı Der Ezzor, ubebzabno u qentrun marduthoyo du İran dkıtyo bi mditho dı Der Ezzor, kımdawım dnoqıl u ideoloji tawdithoyo folitiqoyo İranoyo l’hawnıd da nacime di mditho.

A’grube mzayne du gabo d’Hizballa du Iraq frisi bu mathıbro d’Almayadin bu madınho dı Der Ezzor, u grube menaye cam radoyotho folhoye mbarbızi bi fnitho d’Alxor ubi fnitho d’Altayarrat dıknıfli b’cımqo d’20 kilomıtre b’gawıd du mathıbro d’Almayadin. Lfuth i mşatasto d’Suriya da zedqe noşoye, a’grube mzayne d’Hizballa mşataslın qeloyotho ba dukotho dıfrisi ebaye u mahıtlın şurone du cafro hedoraye. İ mşatasto d’Suriya ba tre yawme dşaficina mawdacwolaste da haylawotho İranoye kımdawmi dmaqwın zıd u haylaththe b’gawıd da fenyotho dıkbışilın b’Suriya. A’haylawotho İranoyeste ya bi masırhonutho di claymutho u yaste bu darbo da hfitwotho uda mcadrınwotho dkımqadmilın kımnasın d’gurşi acomure di duktho lafelaye.

Camgabıdathe, i mşatasto d’Suriya da zedqe noşoye mawdacla du qentrun marduthoyo du İran dkıtyo bi mditho dı Der Ezzor, mtayable hfitutho dı tuyolo l’hedor d’30 nacime ma nabne di mditho li gantho da hawrone dımşatsole u qentrun İranoyo bi qritho dı Hwejıt Sagır. A İranoye ba hfitwothani dıksaymilın kıbci dmarhımi ruhaye ba comure di mditho dı Der Ezzor, u d’macbıri u ideoloji dkıtlın b’hawnıd da nacime.

Meqım matheste 22 bu yarhano, i mşatasto d’Suriya da zedqe noşoye mawdacwola du grub d’Fatimiyun dıkmısnıd mu İran, şrewole u huyodo da nakore du rejim d’Suriya dkıtyo ba fenyotho hedor di mditho d’Almayadin. U grub d’Fatimiyun bıthır mdışrewole u huyodo, mşarewole dımqadım mkone la nakore dıdawri anarcothaththe b’timone d’zuze nhıttır, ube bzabno kşoqalwo u mashul di zaricutho menaye.

Lfuth a’hazoye folitiqoye emwothoye, ahjome mtakse dıkmisomi cala haylawotho İranoye ucala noqufathe b’Suriya, gımazidi ham u husrono u hamıste u hboso cal Tahran hul dkaybo rişa qum da talabe du kenşo emwothoyo.