U Iraq mıdle tedbire dmisım u sutoro di fnitho yarıqto

İ şultonutho du Iraq mıdla tedbire leşan dmisım u sutoro da şutose diplomatiqoye dkıtne bıgawe di fnitho yarıqto bi arişkoyto d’Boğdod.

 Me gabo hreno, atloth rişonwotho du Iraq wi mathlonutho d’Emwotho Mhaydotho, makadlın u snodathe la guboye gawonoye dıkmıntır dmisomi bu yarho d’Hziron dıbqamuthayna.

 U malolo di şultonutho du Iraq Ahmad Alsahhaf, bi maqırhonutho dhule, mawdacle di şultonutho mıdla tedbire leşan dmiamno i mşaynutho da şutose diplomatiqoye dkıtne bi fnitho yarıqto b’Boğdod. Lfuth a tedbirani, i şultonutho du mazadla a folhayda bi fnitho Yarıqto u maqwela u haylayda di mşaynutho ba şawthawotho d’Boğdod.

Alsahhaf mawdacleste di şultonutho kımdawmo a buqorayda bi sbutho da hjome dsimi ma grube mzayne dıkmısnodi mu İran cali rişizgadutho Amerikoyto ucala şutose ruşmoye hrene dkıtne bi fnitho yarıqto.İ fnitho yarıqto b’Boğdod mido ğalabe naqlat nişo la soruhe dıkmihalqi ma grube mzayne du İran, u cıl mıd kobo i şultonutho du Iraq şudoyo dgımaqwiyo i mşaynutho d’Boğdod, elo hulucdo lo qadiro dmısko ulo ha ma grubani dıkhojım cali fnitho yarıqto.

Mxasra hreto, a 3 rişone du Iraq u rişqutno Barham Saleh, u rişwazire Mustafa Alkazimi wu rişono du parlamento Muhammad Alhalbusi, bu knuşyo dhawilın cami mathlonitho d’Emwotho Mhaydotho bu Iraq Jeanine Hennis Plasschaert, drışlın a hedriyat da guboye gawonoye. Bu knuşyano fsiq dmitahwe snodo kamilo lu komisyon celoyo da guboye du Iraq, leşan dqodır dsoyım i wolitho dıknıflo acle lfuth a qonune du nomuso esonoyo, bnişo dmisomi a guboye du parlamento.

A mıştawtıfone du knuşyano makadlınste dıklozım dmitafıt la haye u mluwo dan 64 du nomuso esonoyo dkıtle asirutho camu şroyo du parlamento ducdo, xıd hedriye la guboye gawonoye dıkmıntır dmisomi 6 bu yarho d’Hziron di şatathe.Me gabo hreno, u komisyon da guboye Iraqoye mawdacle dgıdobe zabno la hayle folitiqoye leşan dqudri dımqadmi a mraşhathe, u dım’aydi ruşmoyith mu komisyon da guboye. U komisyon makadleste dkıtyo b’fusqono kamilo’yo dmisım guboye şafye u kine, udmisımste u garanti du duyoqathe me Emwotho Mhaydotho.