U Iraq qrele athrawotho frişe laşan dmaklın Turkiya ma cuqobeyda dıkseymolın

U Iraq, sımle qroyto l’Britania, l’Fransa u l’Almanya dmıştacın dawro hfito, bu tekliyo da cuqobe oyaroye dıksaymo Turkiya calan arcothayde du garbyo du athro.

 I qroytathe du Iraq simo, bıthır ma hjome dsımwola Turkiya meqım şabtho qariwo l’Arbil bı tayosto dılo pilot. Bu cuqobano d’Turkiya, qtılwo 2 mşale da noture da thume du Iraq.

U waziro di baroyutho du Iraq Fuad Hussein, hawile mamle frişe bu telefon camu baramnayde d’Fransa Jean Yves Le Drian, d’Almanya Heiko Maas wu camu waziro Britanoyo dcala sebwotho du Madınho Mescoyo u du garbyo d’Afriqya James Cleverly.

Ba droşani dhawın, u waziro Iraqoyo mahkele cali aykanoyutho harayto u cala şuşote folitiqoye u di mşaynutho du athro; beynothaye i sbutho da cuqobe oyaroye dıksaymo Turkiya cal dukotho frişe du garbyo du Iraq bu taro da hjome dıksaymo calu gerilla di PKK.

U waziro Iraqoyo Hussein, krıhle adyoşe d’Turkiya cali morutho du Iraq u maslele u qatlo da mşale folhoye b’Sidakan dkıtyo bu garbay madınho di mditho d’Arbil yawme dıtlotho dı şafıcina. Bu mamlayde Hussein makadle cali ulsoyutho da şultonwothathe dmaydi dawro hfito, lu tekliyo da hjomani d’Turkiya calu Iraq u dmıgroşi a folhe Turkoye man arcotho du athrayde.

A wazire nuxroyeste makadlın cali sniqutho du iqoro da prensibe di şbobutho u du iqoro li morutho du Iraq u li mlahmonutho da thumayde. Elo i wazirutho di baroyutho d’Turkiya lo şamico la sturyani u mawdacla, dgımdawmi a cuqobathe cali PKK, en Boğdod dılo maqimo i ithuthathe bu garbyo du athro.