U koalisyon emhoyo qtile mşalo d’Dacıs v’İdlib

IDLIB — Bu garbay macırbo d’İdlıb b’Suriya, sımwolın athmıl a helikoptere du koalisyon Emwothoyo cuqobe casye u manhatwolın folhe bi hiğmonutho leşan u msoko da krılyotho du tukoso marhıbono d’Dacış. Bu cuqobo dilonoyo dsim cal bayto b’Atmeh bu garbyo d’İdlıb, qtil mşalo du tukoso marhıbono d’ışme Salah Numan.

U marhıbonano, mşalo du kordinasyon udi mtaksutho da krılyotho d’Dacış b’Suriya’we, ubu zabno dabıc dımhalıq ruhe mu balkon, qtil baroyo ma hayle du koalisyon Emwothoyo. A neşe wu abro du marhıbono sim buqore acmaye wa alat du elektronik dımqafın bu bayto’ste mahıt ido aclaye.

Bu Cıraq’ste sim cuqobo calu tukoso marhıbono wi mdabronutho da istixbarat mawdacla dsim adyawma cuqobo dilonoyo mu ğrob dan 6 da hayle du garbiyo d’Boğdod, u mıski ha ma marıhbone d’Dacış dkıtyo u mşalo du feroqo da kafalat du tukoso marıhbono. U marıhbonano maslım bıthır lu bethdino leşan dmimıd fusqono bhaq dide. 

U Komisyon Emwothoyo dıkmcaqıb i sbutho di marhıbonutho, frısle u taşrorayde di şato u maslım lu Mawtbo di Mşaynutho d’Emwotho Mhaydotho leşan dmıdrış tamo. Bu taşrorano griş u zuhoro cal aydarbo Dacış kmıstafıd mi xalyutho dkito b’Suriya, ban athrawotho d’Asia i mescoyto udu d’Afriqya i mescoyto leşan dmaqwe ruhe me hatho.

Bu knuşyano, kle cala qente u gzome dheş kımşakıl u tukoso marhıbono b’britho dkull zabno kımşahlıf a taktikayde, kımaqwe ruhe bu haqlo du cyber u dıkmbarbız u ideolojiayde leşan dmaqwe ruhe u dmahrıw i mşaynutho-dilonoyith b’Suriya, bu Cıraq ubı Afriqya. Bu taşrorano dmahke cala mşale d’Dacış dqtili, elo camathe’ste a hçome kımdawmi cala hayle d’QASAD bu qlimo d’Deyr Ezzor uğer dukotho.