U komisyon da cuboye du Ciraq maklele hul ucdo 470 mraşhe

BOGHDOD — U hadomo du grub du tboco froso du komisyon celoyo şaryo da guboye du Ciraq Al(h)asan Qabas, bi maqırhonutho dhule lu ajans da tebe du Ciraq mawdacle du menyono da mraşhe dmarhıqi mi kampania da guboye mati hul ucdo l’zıd m’470 mraşhe, u grışle ste u zuhoro cali lohitho haroyto dnafqowa udıkhobşowa b’gawa 253 mraşhe dmarhıqi ma muroye da guboye. 

Qabas mawdacle ste lfuth u qonuno, bıthır mıdmitahwe xabro lu mraşho aw lo gabayde dmarhıq ma guboye, kmitahwe lu gabo muhle dı tlotho yawme laşan dımşahılfi u mraşho b’farsufo hreno, wu mraşho dmarhıq ma guboye kıtle u zedqo dfotıh dacwa bi bethdino mqabıl du fusqono dmid bhaq dide. 

Qabas mırle ste “u komisyon şutoso noytral yo, ulatle manfaca lo mu terhiqo d’mraşho uloste mi mıştawtfonuthayde. U fusqono haroyo kdocır li sictho du bethdino. Udothe u bethdino dmoyıd fusqono lu yuthrono du mraşho dmarhıq ma guboye, gıdmitadcır ışme dmitahıt m’hatho bi lohitho da guboye”. 

Kito zıd m’30 mraşhe Mşihoye ya b’şıkıl farsufoyo, yaste b’gawıd d’koaliyon u ya b’gawıd d’gabo, dmıştawtaflın ucdo la muroye dcala hamşo kursiye dımbaynile u qonuno da guboye du parlamento du Ciraq la Mşihoye, udkıtne mfarqe cala hiğmınwotho d’Boğdod, Ninwe, Kerxıslox, Nuhadra u Arbil. Wu komisyon da guboye du Ciraq mawdacle dmarhıq tlotho mraşhe Mşihoye mi kampania da guboye l’celtotho mşahılfe.