U menyono da mithe da folhe d’Turkiya b’İdlib ba mowatne latne ba casrowat
U mınyono da folhe Turkoye dıqtili mıqayo heş latyo idico metul dkito tebe mşahılfe bi sbuthathe u hathe mahwela bu mamlo dsımle urişqutno Erdoğan naqa mırle 36 qtili u bıthır mırle 34 qtili.
Lfuth a tebe dfrisi ba nawle knuşyoye kmahwe da qtiloye d’Turkiya zıttır me 100 farsufene wa mjarheste hawxa.
Bi sbuthathe u mede dıkgorış u zuhoro, qay u hiğmuno d’Hatay Rahmi Doğan mıdle i mşalutho da tebe qamoye dhiwi cala qtiloye ulo ha ma wazire dkıtne mşale bi sbuthathe. Bıthır ma tebe qamoye dfrisi bu tbocofroso, nafıq mawduconwotho ma folhe dkıtwın b’İdlib uma farsufe dı nqilin a mjarhe wa qtiloye mi duktho.
Lfuth a qole dmanıhti lu tbocofroso kenşoyo kmitawmır, da hayle d’Rusya mşawtıfo camu rejim d’Suriya mhelın tabur da hayle Turkoye b’İdlib. Mawxa u mınyono da qtiloye uda mçarhe-2 qatat zıttır mu mede dmawdıcyo. Mathlo bha ma qole kmitawmır; Ahna nqilan bu noquso 45 şlade u hzelan zıttır me 100 mçarhe-tray mani dfayişi tahte da shifotho du bınyono dımfarqıc cala folhe Turkoye.
Bi sbuthathe kito qole u mawdconwotho bu zyudathe kırumzi du mınyono da qtiloye Turkoye zıttır ma folhene, elo Turkiya ktulyo u mınyonano. Mathlo ba yawmotho d’şaficinaste u rişqutno d’Turkiya Erdoğan mawdacwole u mınyono da folhe dı qtili b’Libya bıthır mu qatlathe bı zabno.
Elo u mede dıkmthabıt du mınyonano latyo şroro, i mawdconutho dhuwle Erdoğan bu mamlo dsımwole bu yawmo trayono dmırle bi qamayto 36 qtiloye u bıthır dacır mırle 34. Be bzabno u froshezwo d’CNN frıswole u tebano d’Erdoğan bıthır mıd mcadewole.
Bcayni zabno u waziro du sutoro d’Turkiya Hulusi Akar mawdacle dımşarelın qrobo ruşmoyo mqabıl du rejim d’Suriya u mırle, madrelan 2 tayosyotho d’Suriya. İ maqırhonuthathe d’Akar hiwo bıthır mu tebo lo şariro dfris, dmadre tayosto d’Suriya u bıthır nafıq dlatyo şroro-elo tayosto du duyoqo d’Turkiya’wa dnafilo’wa.