U polis du Swed mahıtle ido cal kmoyutho rabtho d’zayne, buğre u mluwe du syomo da foqucotho

Athmıl bi şoctho da 2 du lalyo, şmic u qolo d’furqoco bi mdito d’Södertelje du Swed u bıthır falge d’şoctho, hawi furqoco hreno. U polis Swedoyo d’azze li şawtho d’Ridtorp, heş lo kodıc i celtho du furqoco mınyo u mawdıc’ste, d’noşo lo mçarıh ba 2 furqocani dsimi cayni şawtho u belhude a bınyone hzelın husrono.

Lfuth u mamlo dıkorıx bi mdito’ste, a hçomani simi cal bote du camaydan. U polis dmabdele buhone bi sbutho da hçomani, kımnase dımqafe şıkıl d’esore cama furqoce hrene dhawın bu Swed. Yawme d’Cruto b’lalyo’ste mçarahwo farsufo b’Trelleborg ma zayne daxiwole b’guşme u lfuth u polis, u hçomano kıtle asirutho ba ğrobe hayobe.

Claymo hreno d’20 eşne mçarıh b’4 buğre daxile b’guşme b’Bredeng bu taymno d’Stockholm. Ba yawmotho dşafıcina’ste msıkwo farsufo dıkmzabanwo zayne lo qonunoye bu Swed. U farsufano bi methcadronutho d’mşalo catiqo di folhutho du Swed kmıthomi bu hawbo di mşatsonutho dhayle aw polis dilonoyo u kıtte asirutho cama naziye.

Calathe hiw yuqro lu msokano du farsufano dıkmifaşıq qento li mşaynutho du Swed. Bu taro du cnufyano dıkmdawım bu Swed, sim buhone cal 500 farsufe dkıtne hadome b’40 şabakat frişe bi marcitho d’Stockholm-dhın kımahwıri zuze, hın dıkqutli uğer’ste dıkmdabri i şuqo ba gelone mtanwone. Bu buhonano magle, dha man 4 sahme claymani’ste mawlıdi bi şato da 2000.