U Polis Iraqoyo mabdele u maşıqlo qamoyo du qyomo d’Şigor

U polis federaloyo du Iraq, mabdele u maşıqlo qamoyo du terkiwo du qyomo dımde beyn di şultonutho d’Boğdod u di şultonutho d’Arbil cali fnitho da Ezidoye-Şigor.

 Bu qyomano tlıbwo dmitaqımi a hayle folhoye hrene dkıtne bi fnitho, u calathe u polis bıdele dmanhıt a remze wa othowiye da ğrube folhoye dmahtiwo ba dukotho ruşmoye d’Şigor.

U polis federaloyo du Iraq dımşadarwo ba yawmotho dşafıcina li fnitho d’Şigor bu garbyo du athro, bdele dmahıt a luhyotho, a remze wa othowiye da ğrube folhoye frişe dkıtne ba wahde u ba dukotho ruşmoye di fnitho. Awkith i otho da hayle da Ezidoye-YBŞ dıkmısnodi mi PKK u ğer hayle da Ezidoye u da hayle d’Haşd al Şacbi.

Bı dukthe di otho da hayle folhoyaniste, mcalaqle u polis Iraqoyo i otho du Iraq cala bınyone ruşmoye di fnitho u bıthır mucdo, hınne gıdsaymi u duyoqo di mşaynutho d’Şigor u da thume d’Suriya. Bu şıkılano, mabdele ucdo u polis u maşıqlo qamoyo du terkiwo du qyomo dımdewo meqım zabno beyn Boğdod u Arbil cal Şigor.

İ şultonutho du Iraq wi şultonutho du qlimo d’Kurdistan mawdacwolın 9 bu yarho d’Teşrin u qamoyo dmatın lı awyutho cal qyomo dımcadli i aykanoyutho d’Şigor dkiba hayle folhoye frişe dkıtne heş hfite. U qyomanoste snıdwo mu kenşo Emwothoyo wu nişayde, dmitaqım u gerilla di PKK, a hayle d’YBŞ wa hayle d’Haşd al Şacbi mi fnithathe dkıtyo cala thume dcam Suriya.

Bu qyomano, sımwoste qroyto lı guboye hathe leşan dminaqe mdabronutho l’Şigor u camu zabnoste dmişakıl haylo folhoyo dqodır dsoyım u duyoqo di fnitho. Meqım mu qtolğenso dsımwolın a marhıbone d’Dacış cal Şigor ba 2014, hoyewo hol 200 alfo bnaynoşo bi fnithathe i sagiyoyuthathe Ezidoye. Ba 6 eşne haroyani, i fnithathe heş lo mhathıtho kamiloyith u mınyono nacimo d’Ezidoye dacirila.